Accessibility links

“Zaman yegetläre” törkeme tarqalırmı?


Tatar cırın, tatar moñın yaratuçılar arasında “Zaman yegetläre” törkeme ayırım urın alıp tora. Çönki alarnıñ icatında xäzer yazılğan estrada cırları ğına tügel, ä zamança eşkärtelgän iske, tatar cırları da bar. Alarnıñ başqaru ostalığı da başqalarnıqınnan ayırılıp tora. Soñğı waqıtta “Zaman yegetläre” icatın yaratuçılar arasında şomlı süzlär yöri başladı – imeşter, yegetlär bergä icat itülären taşlıylar, törkem tarqala ikän. Bu könnärdä şul xaqta xätta İntertat.ru gäciteneñ forumında da yazıp çıqtılar. Ägär dä bu döreslekkä turı kilsä, bik qızğanıç, bezneñ estradada bütän andıy törkem yuq, dip qayğıralar anda. Şuşı xaqta törle imeş-mimeşlärne taratıp, döreslekne beleşer öçen bez älege törkemneñ cırçısı Zakir Şaxbanğa möräcäğät ittek. Qızğanıçqa qarşı, “Zaman yegetläre” törkemeneñ fanatların bez bernärsä belän dä quandıra almıybız. Törkem tiz arada çınnan da tarqalırğa cıyına ikän. Bu xaqta Zakir äfände üze söyli.

Qızğanıçqa qarşı, bez çınnan da taralırğa buldıq. Bu dönyada bar närsäneñ dä üz waqıtı bar, bezneñ dä taralırğa waqıt citkänder küräseñ. Bergä eşlägän yegetlärgä min barısı öçen dä räxmätle, bez 8 yıl bik äybät kenä eşlädek. Läkin xäzer min şäxsi icat yulımnı başlarğa buldım.

Şulay itep, bez “Zaman yegetläre”neñ yaña cırların bütän işetä almıybız. Şunısı quanıçlı – törkemneñ töp cırçısı häm anıñ yöze bulğan Zakir Şaxban üzeneñ icat yulın tämamlamıy. Dimäk, bez äle anıñ moñlı, yöräkkä ütep kerä torğan tawışın işetüdän mäxrüm bulmayaçaqbız.

Söyläşü waqıtında Zakir äfände bezgä tağın ber qızıqlı xäbär äytte. Kiläçäktä ul äle icat belän genä dä çiklänergä cıyınmıy ikän.

Min äle ictimaği eşlär belän dä şöğellänergä cıyınam. Min üzem Novosibirski şähärennän. Şuña kürä andağı millättäşlärebezneñ tormışı mine bitaraf qaldıra almıy. Şuña kürä min Novosibirski ölkäse tatar milli-mädäni möxtäriäteneñ mondağı wäkile bulıp toram. Bez alar belän nıq elemtädä torabız häm min alarğa mömkin qädär yärdäm itärgä tırışam. Xäzer ölkäneñ tatar mäktäpläre öçen däresleklär kiräk, şularnı yünätü östendä eşlim äle.Şulay itep, kiläçäktä Zakir Şaxbannıñ tawışın bez säxnädän genä tügel, ä bälki radio aşa da, Novosibirskidağı millättäşlärebezneñ tormışı turında söylägändä dä işetä alırbız. Ni disäñ dä, üzeneñ tuğan yağı, andağı qızıqlı keşelär, millättäşlärebezneñ tormışı turında ul küplärdän äybäträk belä bit.

Gölnaz İlgizär

XS
SM
MD
LG