17nçe sintäber könne köndezge säğät ikedä Qayum Nasıyri muzeyında Qazannıñ meñyıllığına bağışlanğan yaña kürgäzmä açıldı. Ul Şihabetdin Märcäni häm Qayum Nasıyri dip isemlängän. Älege kürgäzmädä tanılğan tatar mäğrifätçese Şihabetdin Märcänineñ qulyazmaları, anıñ eşçänlegenä qağılışlı dokumentlar urın alğan. Şulay uq muzeyğa kilüçelär Rawil Zahidullinnıñ Märcänigä bağışlanğan räsemnäre, kalligraf Näcip Näqqaşnıñ şämailläre kürgäzmäse belän dä tanışa alalar. Muzey xezmätkärläre süzlärenä qarağanda, kürgäzmä uqu yılı däwamında eşläyäçäk. Sişämbe könne Tel, ädäbiät häm sängät institutında tanılğan ğalim Möxämmät Ğäynullinğa bağışlanğan cıyılış uzdı. Anda ğalimneñ tormış yulı, anıñ küpsanlı xezmätläre, alarnıñ bügenge köndäge aktuallege turında söyläşü bardı. Cıyılışta qatnaşuçılar Möxämmät Ğäynullinnıñ bay mirasın onıtmasqa çaqırdılar häm kiläçäktä ğalim isemendäge uqular ütkärü niäte belän çıqtılar.
Gölnaz İlgizär
Qazan teatrları da yalların tämamlıy. Ä menä Musa Cälil isemendäge opera häm balet teatrı üzeneñ yaña sezonın inde açtı da. Läkin teatrnıñ binası remontta bulu säbäple, alar sezonnıñ berençe premyerasın tamaşaçılarğa Ğäliäskär Kamal teatrında täqdim ittelär. Tatar akademiä teatrı isä berençe spektaklen 3nçe oktäberdä quyaçaq. Ul könne Kamallılar tamaşaçığa «Zäñgär şäl» spektaklen kürsätäçäk. Ğädättägeçä, Kamal teatrı premyeralar da äzerli. Bıyıl alar ikäw bulaçaq. Şularnıñ berençese – «Qazan sölgese» spektakle tamaşaçılarğa inde 4nçe oktäberdä ük täqdim itäçäk. Xäyer, äle bu ğına da tügel. Ğäliäskär Kamal teatrı tamaşaçılarğa, bigräk tä cırçı Salawatnıñ icatın yaratuçılarğa, tağın ber syurpriz äzerlägän. 28nçe sintäberdä anıñ «Bäxet belän yänäşä» dip isemlängän tağın ber konsertı uzaçaq. Oyıştıruçılar süzlärenä qarağanda, bu konsertnı İnternettan da qarap bulaçaq. Şunısın da äytergä kiräk, tizdän İnternetta Kamal teatrınıñ säxifäse açılaçaq. Anı täqdir itü kiçäse teatrda 2nçe oktäberdä uzaçaq. Tağın ber Salawatqa bäyle xäbär. Läkin bu yulı ul inde sport temasına. Küptän tügel genä cırçı Kurski şähärennän qayttı. Anda ul Rusiäneñ avtouzışlar buyınça çempionatında qatnaşıp, ikençe urın alıp qaytqan.
