Udmurtiä başqalası İjawda xäläl rizıq satu noqtaları buldırıldı

Möselmannarnıñ tuqlanuında xäramnan tıyılu — täp prinsip bulıp tora. Udmurtiä başqalası İjawda yäşäwçe din qärdäşlärebezgä bügen berniçä cirdä xäläl rizıq satıp alu mömkin buldı. Ul aşamlıqlarnı, biğreq tä it produktsiäsen, Tatarstan häm Başqortstan respublikalarınnan kiterep satalar. Şulay uq İjawda yäşäwçe möselmannar da xäläl it satunı üzläre dä oyıştırdı. Şundıy islam dine qanunnarı buyınça eşqertelğen itne başta mäçet qarşında açılğan kibettän alırğa mömkin buldı. Soñraq başqa möselmannar da üzläreneñ öylärendä it satu oyıştırdı. Alarnıñ berse — millättäşebez İrek Xisametdinov. Ul başta üz öennän möselmannarnı xäläl it belän tä'min itä başlasa, alğa taba it kombinatı citäkçese belän söyläşep, berniçä tärle qazılıq ta eşkärtep, satuğa çığardı. Başlanğıç çorda uzeşçän räweştä öydän satu itelsä, xäzer İrek Xisametdinov üze yäşägän Lenin rayonı administratsiäsendä maltabarlar bülegendä räsmi terkälde. Bu aña ber kibettä it häm başqa produktsiä belän satu itü mömkinlegen açtı. İrek Xisametdinovnıñ üze belän oçraşıp, aña berniçä soraw da birdem. "Din yulına basuçılar sanı kübäyde, alar xaram rizıqtan tıyıla, xäläl aşamlıq ezli başladı, şuña bu eşkä alındım. Başta it, soñraq qazılıq ta yasıy başladım. Bu eşne tağın da kiñräk cäyelderergä niätem…." İrek Xisametdinov oyıştırğan xäläl it satu noqtalarınıñ berse —Ijaw şähäreneñ «Bolğar» kibetendä keşe çirat tormasa da, kibetçeneñ qul quşırıp torırğa waqıtı yuq. Ber—ike keşe ber tuqtawsız kilep tora. Satuçını da butap bulmıy, başqalardan ul möselmança kiemnäre belän ayırılıp tora. Ä uze yäş kene qız. Tanışabız. "Tänzilä Gabbasova. Monda küptän tügel eşli. Oşıy. Keşelär atna kiç häm comğa könnärendä kübräk kilä, çönki bu könnärdä yaña produktsiä kiterelä…." Därestän dä, biregä tatarlar ğına tügel, başqa millät wäkilläre dä kilä ikän, alarğa produktsiä oşıy. Ul atnalar buyına yatqan rizıq tügel. Kem it sorıy, kem qazılıq ala, häm çağıştırmaça, bäyälär dä beraz arzanraq. İrek Xisametdinovnıñ alğa taba tağın berär kibettä xäläl it satu noqtası buldıru niäte bar. Ul inde satuçı bulıp eşlärgä teläk belderep kilüçelär dä bar, monıñ öçen waqıt qına kiräk dip belderde.

Xamidä Ğayfullina, Udmurtia