1nçe oktäber könne yaña sezonnı Tatar däwlät cır häm biü ansamble başlap cibäräçäk. Üzläreneñ säxnäläre bulmaw säbäple alarnıñ konsertı Kärim Tinçurin teatrında uzaçaq. Xalqıbıznıñ bay muzıkal’ mirasın saqlawçı älege törkem tamaşaçılarğa bıyıl da bik qızıqlı yañartılğan programma täqdim itä. Konsertta milli mädäniätne berläştergän häm millättäşlärebez kümäkläşep yäşägän ayırım töbäklärdäge tatarlarnıñ tormışın, könküreşlären çağıldıra torğan biülär dä urın alğan. Ansambl’neñ yaña programması Ufa, Perm’, Nijgar, Samar, Orenbur, noğaybäk tatarlarınıñ fol’klorı belän tanışırğa, şulay uq başqa millät wäkilläreneñ biülären dä kürergä mömkinlek birä.
3nçe oktäberdä isä Ğäliäskär Kamal isemendäge Tatar akademiä teatrı artistları tamaşaçılarğa üzläreneñ berençe spektaklen täqdim itäçäk. Monda bıyıl sezon «Zäñgär şäl» spektakle belän açılaçaq. İkençe könne ük, 4nçe oktäberdä, Kamal teatrı tamaşaçılarğa bıyılğı sezondağı berençe premyera – «Qazan sölgese» spektaklen kürsätäçäk. Teatrda tağın ber yaña spektakl’ da äzerlilär. Ul «Yar» dip isemlängän häm anı dramaturg Ayaz Ğiläcev yazğan. Ğäliäskär Kamal teatrı säxnäsendä bulaçaq tağın ber tamaşa turında isegezgä töşerep ütäbez. 29nçı sintäber könne monda cırçı Salawatnıñ «Bäxet belän yänäşä» dip isemlängän konsertı uzaçaq.Yazmabıznı yäş bulsa da, qızıqlı repertuarğa iä bulğan tağın ber teatr belän tämamlıybız, xörmätle tıñlawçılar. Qazan tatar däwlät yäş tamaşaçılar teatrı bıyıl äle üzeneñ 16nçı sezonın ğına başlap cibärergä cıyına. Şuña da anıñ belän küplär bik tanış ta tügel. Citmäsä, teatrnıñ repertuarı da üzençälekle – ul nigezdä balalar öçen icat itä. Monda uynala torğan spektakl’lärneñ 70 protsentı – balalar öçen quyılğan. Teatr Qazannıñ Gladilova uramı 49nçı yortta urnaşqan. Älege teatrnıñ baş rejisserı Rinat Mirzaxäsän ulı Äyupov äytüençä, teatrnıñ bıyılğı sezonı 10nçı oktäber könne Räbit Batullanıñ «Saq-Soq» spektakle belän açılaçaq. Şulay uq tamaşaçılarnı tağın ber premyera – Tufan Miñnullinnıñ «Diläfrüzgä 4 kiäw komediäse» dä kötä.
Gölnaz İlgizär
