Accessibility links

Yekaterinburda qartlar yortı olılar könen bilgeläp ütte


1nçe oktäberdä menä inde unberençe yıl rättän Rusiädä olı keşelär köne bilgelänep ütelde. Yekaterinburg şähäreneñ Raxman mäçete möselmannarı bu köndä şähärneñ Ordjonikidze rayonı qartlar häm ğäriplär yortına anda yäşäwçelärne şuşı kön belän täbrik itärgä bardılar. Raxman mäçete möselmannarı biredä berençe tapqır tügel. Bu yortta yäşäwçelär arasında möselman xalqı çağıştırmaça az bulsa da, alarnı gel kötep alalar. Mäçetneñ imamı Ruslan xäzrät äytüençä, qartlar häm ğäriplär yortı citäkçeläre biredä islam dine asılın, anıñ qanunnarın öyränü öçen maxsus däreslär oyıştırırğa da rizalıq birgännär. İslam däresläre biredä ozaqlamıy, oktäber ayında başlanaçaq. Märxämätlelekneñ çige yuq. Olılar köne belän täbrik itärgä Ordjonikidze rayonı qartlar yortına ul könne ölkä xökümäte wäkilläre dä, şähär duması deputatları da, rayon xakimiätennän häm ruxi idärälärdän dä küp kildelär. Balalar yortınnan kilgän yätimnär olılar aldında bik matur konsert ta quydılar. Biredä yäşäwçelär öçen matur tabın da äzerlände, cılı, matur teläklär telände. Ämma älege awır yazmışlı keşelärneñ küzlärendäge mäñgelek moñsulıq çatqısın berni dä basa almas inde. Kemnär genä yuq alar arasında! Bäyräm xörmätenä dip kükräklärenä orden-medal'lären taqqan suğış veterannarı da, tormış awırlıqları bitlärenä yul-yul cıyırçıq bulıp yatqan çal çäçle, qarawçısız qalğan äbi-babaylar da, kemnärneñder saqsızlığı arqasında ğömerlek ğäriplek alğan yazmışlar da, tumıştan uq zäğif bulıp, tulı tormış şatlığınnan mäxrüm qaluçılar da citärlek biredä. Ziräk könçığış äyteme buyınça, xoday täğälä olılarnı xörmät itä belmägän keşegä ozın ğömer birmäs, nigä kiräk andıy keşegä ul yaratmağan olı yäşkä citü. Yuqqa da xätere qalğan, az ğına cılı süzdän dä küñele bulğan olılarğa bezneñ xörmät niçek kiräkter! Ğömer közen kiçergän ölkännärgä bolay da ciñel tügel bit. Rusiädä küplärneñ pensiäse meñ yarım sum tiräse külämne täşkil itä. Anıñ öçtän berennän artığrağı fatirğa, utqa, telefonğa kitsä, qalğanın tögäl utız köngä bülsäñ, ipi belän sötkä genä qala ikän läbasa aqça! Ä olığayğaç qaqşağan sälämätlekne tözätergä daru, kiem-salım kebek kiräk-yaraqlarğa qaydan alırğa? Uylap qarasañ alarnıñ sabırlığına xäyran qalırlıq bit. Utnı-sunı kiçkän, tormışnıñ açısın-töçesen tatığan Orqıya apa Xayäliewa äytüençä, cir yözendä tınıçlıq bulsa, şunnan da qäderlese yök. Başqa awırlıqlarğa tüzärgä bula. Qartlıq härkemgä dä kiläçäk. Xoday täğälä yäşräklär küñelenä miherbanlıq salsın, ölkännärgä küñel tınıçlığı, tazalıq, layıqlı qartlıq birsen dip telise kilä.

Fäwiä Safiullina, Yekaterinbur
XS
SM
MD
LG