3nçe oktäber könne Ğäliäskär Kamal isemendäge Tatar däwlät akademiä teatrı üzeneñ yaña sezonın başlap cibärde. Kamallılar bu sezonnı da «Zäñgär şäl» spektakle belän açtılar. Läkin comğa kiçen teatrğa spektakl’ qararğa dip kilgän tamaşaçılar, tağın ber qızıqlı çarada qatnaşa aldılar. Eş şunda, 3nçe oktäber könne, «Zäñgär şäl» başlanır aldınnan Kamal teatrınıñ İnternet säxifäsen täqdir itü uzdı. Xäzer telägän keşe www.kamaltat.ru adresı buyınça kerep, Kamal teatrınıñ tarixı, anıñ xäzerge köne, repertuarı belän tanışa ala. Säxifädä şulay uq teatrnıñ artistları, rejisserları, kürenekle tatar dramaturgları turında da mäğlümatlär alıp bulaçaq. Saytnı yasawçılar süzlärenä qarağanda, kiläçäktä monda teatrnıñ spektakl’lären dä qarap bulaçaq. Şimbä, 4nçe oktäberdä isä, kamallılar tamaşaçılarğa bıyılğı sezonnıñ berençe premyerasın Kärim Tinçurinnıñ «Qazan sölgese» spektaklen täqdim itäçäk.
Kamal teatrı häm Mädäniät ministrlığı tarafınnan iğlan itelgän Yaña tatar pyesası bäygese däwam itä. Oyıştıruçılar äytüençä, bäyge şaqtıy uñışlı bara. Bügenge köndä jyuri tarafına 30ğa yaqın äsär täqdim itelgän. Alar arasında tatarça ğına tügel, ä rusça häm başqortça da pyesalar bar ikän. İsegezgä töşerep ütik, älege bäygeneñ näticäläre abruylı jyuri tarafınnan kiläse yılnıñ fevral’ ayında iğlan iteläçäk.
Gölnaz İlgizär
