Sverdlov ölkäsendä yaña mädäni sezon Tatarstannıñ xalıq artistçası Xäniä Färxi konsertı belän açılıp kitkän ide. Oktäber ayında Salawat, Göldaniä konsertları kötelä. Qazannan kilgän tatar estrada yoldızları, şulay ay sayın kilep, biredä yäşäwçe tatar xalqın quandırıp toralar. Matur konsertlar qaraw belän berrättän, xalıqnı mädäniät yortlarına üzara aralaşu, küptän küreşmägän tanışlarnı, duslarnı kürü teläge dä tarta.
Qayçandır işetelgän ber mäqäl istä qalğan - ber tatarnı ayırım tönyaq qotıpqa iltep quy, ul şunda uq ikençe tatarnı ezläp tabıp, alar aralaşıp yäşi başlayaçaq, digännär ide rus tanışlar. Üzara aralaşıp yäşäw çınlap ta bezneñ tatarnıñ qanına señgän.
Yekaterinburg şähäre tatarlarınıñ milli-mädäni moxtäriäte citäkçese Eliza Safiullina fikerençä, tatarlarnı üzara aralaştıru öçen tatar konsertların ğına kötep yäşäw kiräkmi. Şul maqsat belän bu könnärdä RTİ mädäniät sarayında tatar yäşläre öçen yal kiçäläre yañadan eşli başladı.
Monnan tış, Eliza xanım ölkänräk yäştäge tatarlar öçen dä oçraşu kiçäläre oyıştırırğa uylıy. Här comğa kön yäşlär öçen, här şimbädä 30 yäştän uzğannar öçen yal kiçäläre oyıştırılaçaq. Oyıştıruçılar fikerençä, ölkänräklärneñ oçraşu kiçäläre törle milli temalarğa, bäyrämnärgä bağışlanıp, küñelle häm faydalı bulıp ütärgä tieş.
