Tatarstanda saylawlarğa äzerlek däwam itä. 9nçı oktäber könne respublika Üzäk saylaw komissiäseneñ utırışı uzdı. Anda komissiä äğzaları saylaw qanunnarındağı üzgäreşlärne tikşerdelär, saylaw okrugların qaradılar, territorial’ komissiälärgä üzgäreşlär kerttelär. Şulay uq utırışta saylawlarnı äzerläwgä häm ütkärügä kitäçäk aqçalarnı xisapladılar. Şunısın da äytergä kiräk, bıyıl älege çaranı ütkärügä aqça 1999nçı yıldağığa qarağanda kübräk birelgän. Barısı deputatlarnı saylawğa Tatarstanğa 50 million sumnan artıq aqça qaralğan. Respublikanıñ Eçke eşlär ministrlığı da şuşı yünäleştä eşkä kereşte. Ul saylawlar qanunnarın bozu oçraqlarına yulığuçılar öçen maxsus, qaynar liniä açtı. Xäzer qanun bozılğan dip sanawçılar täwlek däwamında 91-23-91 telefonına şaltıratıp, älege oçraqlar xaqında Eçke eşlär ministrlığı xezmätkärlärenä citkerä ala.
