Rusiädä 12nçe oktäberdä awıl xucalığı könen bäyräm itälär. Äytergä kiräk, bu Tatarstan öçen dä bik zur bäyräm. Çönki respublikada awıl xucalığı tarmağı ber yaqtan iñ töp tarmaqlarnıñ berse bulıp torsa, ikençe yaqtan bezdä ul Rusiäneñ başqa töbäkläre belän çağıştırğanda şaqtıy alğa kitkän, zur üseş alğan ölkä. Kürşe-tirä respublikalarnıñ utırtılmağan qırların, ülem aldında torğan terlekçelek tarmağın istä totqanda, tatarstanlılarnıñ bu ölkädäge uñışları ayıruça zur kürenä. Xäyer, inde menä niçänçe yıl rättän cıyıla torğan mul uñış, awıl keşeseneñ bernigä dä qaramıyça tırışıp eşläwe çınnan da ixtiramğa häm xörmätkä layıq. Bäyräm aldınnan, bigräk tä. Läkin respublikanıñ awıl xucalığı ministrlığında bezgä bu könnärdä bernindi dä bäyräm çaraları ütmäwe turında xäbär ittelär. Awıl xucalığı xezmätkärläre öçen zur bäyräm çaraları, aldınğılarnı xörmätläw, tantanalı çaralar uzdıru noyäber’ başına küçerelgän. Monıñ säbäplären ministrlıqnıñ xezmätkäre äle Tatarstanda haman da däwam itkän uñışnı cıyu belän añlattı. Awılda xäzergä äle bäyräm itärgä waqıt yuq, alar tırışıp eşläwlären däwam itälär, dide ul. Citmäsä, ministr Marat Äxmätov ta bu könnärdä äle Qazanda tügel, Mäskäwdä ikän. Ul anda uza torğan awıl xucalığı qazanışlarına bağışlanğan kürgäzmädä häm bäyräm çaralarında qatnaşa, Tatarstan awıl xucalığı tarmağın üsterü buyınça täcribä urtaqlaşa. Älbättä, respublikada da älege tarmaqta problemalar häm qıyınlıqlar yuq tügel. Kiresençä, başqa tarmaqlar belän çağıştırğanda alar bälki äle kübräk häm tiränräktäder dä.
Gölnaz İlgizär
