Watanım oyışmasınıñ Tatarstan bülekçäse Rusiä töbäklärendä iñ berençe bulıp oyıştırıldı. Anıñ citäkçese itep Qazan mediko-instrumental’ zavodı citäkçese Nur Xämzä ulı Şakirov quyılğan. Ul Tatarstanda abruylı şäxes, anıñ citäkçelegendäge zavodta kardioxirurg Rinat Aqçurin qullana torğan cihazlar eşlänä. Watanımnıñ Tatarstan bülekçäse utırışı Säwdä-sänäğät palata binasında ütte. Bulaçaq watanımçılar sıyfatında Qazannıñ iñ zur şirkätläre aviatsiya berläşmäse, radiopribor, elektropribor häm başqa zavodlarnıñ direktorları, institut rektorları, şulay uq tatarstannıñ elekke Elemtä ministrı İlgiz Raxmanqulov, Mansur Şihapov häm başqalar cıyılışta qatnaştı. Rinat Aqçurin Watanım oyışması turında mäğlümat birde, plannar häm aktual’ mäs’älälär xaqında Fikrät Tabeyev, general-polkovnik, Mäskäw tatar milli-mädäni moxtariäte räise Räsim Aqçurin, tatar ictimaği üzäge räise Räşid Yağfarov, Ufada yäşäwçe eşquar Ramil Bignov, akademik Mirfatix Zäkiev, ğalim häm pedagog Rüzäl Yusupov häm başqalar çığış yasadı. Oyışmanıñ kiläçäkkä proyektları häm Tatarstan bülekçäseneñ idärä äğzäläre raslandı. Tatarstan prezidentı kiñäşçese Rafael’ Xäkimov, Ministrlar Kabinetı xezmätkäre Räis Töxwätullin da şunda buldı. Şulay itep, Watanım oyışması Tatarstan bülekçäse eşkä kereşä. Aña räsmi dairälär uñay mönäsäbät kürsätä, «Tatarskiy mir» gazetasında Tatarstanğa här tatar milli tereleşenä tänqit mäqälälären iskä aluçı yuq. Älege utırışta qatnaşuçılarğa Vadim Çurbanovnıñ «Kazanskiy kotel» mäqäläse basılğan gazeta sanı da taratıldı.
Gölnaz İlgizär
Comğa könne Qazanda şaqtıy üzençälekle waqiğa buldı. Watanım dip atalğan oyışmanıñ Tatarstan bülekçäse üzeneñ täqdir itü cıyılışın ütkärde. Xirurg Rinat Aqçurin citäkçelegendäge bu oyışma ike yıl elek Mäskäwdä yäşäwçe qayber bilgele tatarlar tarafınnan oyıştırılğan ide. Anı ğämälgä quyuçılarnıñ häm idärä äğzäläreneñ isemnäre küplärgä mäğlüm. Akademik Robert Niğmätullin, Rusiä Yuğarı Mäxkämäse räise urınbasarı Rinat Smakov, Tatarstannıñ elekke citäkçese Fikrät Tabeev, general-polkovnik Räsim Aqçurin häm başqalar. Nekommerçeskoe partnerstvo statusındağı bu oyışma tatar xalqın yaqlarğa, üze tiräsendä berläşterergä omtıla. Anıñ Bötendönya tatar kongressı, Tatarstannıñ räsmi xakimiäte belän mönäsäbätläre şaqtıy qatlawlı. Watanım citäkçeläreneñ tatar xalqı isemennän latin imlasına qarşı xat imzalawları qarşılıqlı tä’sir qaldırğan ide. Soñğı waqıtta «Tatarskiy mir» gazetasın çığaru, Tatarskiy vopros v Rossii digän fänni seminarlar ütkärü Qazan belän Mäskäw arasında yaña xezmättäşlek häm aña bäxäslär uyatqan ide.
