Accessibility links

Кайнар хәбәр

Tatar yäşläreneñ yaña ğämäle. Flash mob.


Şuşı yal könnärendä dönyada tarala başlağan yaña ber uyın, flash mob çarası Qazanda da bulıp ütte. Flash mob çit illärdä barlıqqa kilgän häm anda taralış alğan ber çara. Anıñ asılı - ber uq mizgeldä ber urınğa xalıq cıyıla häm bötenese ber yulı ber ük ğämälne başqara. Çara ğädättä 4-5 minut qına däwam itä. Şuña kürä flash mobta qatnaşuçılar bilgelängän ber minutqa kilä häm ğämälne başqarğannan ber süzsez törlese-törle yaqqa tarala.

Flash mob xäräkäte inde küptännän Rusiägä ütep kerde häm zur şähärlärdä bik tiz arada tamır cäyde. Mäsälän ütkän berniçä atnada Mäskäw, Çiläbe, Yekaterinbur, Samar , Petrozavodskiy, Yaroslavl häm Qazanda flash mob çaraları ütte. Bu xaqta flashmob.ru digän internet säxifäse xäbär itte.

Ber ük waqıtta kilep çığu häm nindider ğämäl başqaru berniçä minut eçendä ütep kitsä dä, aña äzerlek eşläre ozağraq waqıt taläp itä. Flash mobta qatnaşuçılar üzläre bu çaranı ğämäl qılu dip atıy. Başta böten keşe ber yulı başqara torğan ğämälneñ mäğnäse xaqında uylanıla. Törle ideyalar täqdim itelä, internet saytlarda fiker alışudan soñ, qaysı ideya ciñä şul tormışqa aşırıla. Mäsälän Mäskäwdä ütkän ber çarada añlaşılmağan süzlär yazılğan taqta belän poyezd qarşılaw çarası bulğan. Kemder oçraqlı xäreflär urınına taqtağa Vladimir Vladimiroviç Putin dip yazırğa täqdim itkän häm qaybereder şulay eşlägän dä. Läkin Flash mob säyäsätennän çittä torırğa tırışa, şuña Prezident isemen yazunı küplär xuplamağan. Ğämäl qıluçılar ber uq minutta törle yaqtan kilep çıqqan, añlaşılmağan yazularnı kütärep torğan häm 4-5 minuttan taralğan.

Yekaterinburda yäşlär şähärdä bilgele ber zur kibet yanına kilep, tübäsenä qarap torğan. Qızıqsınuçılar sorawına «xäzer kürersez, kibetneñ qalay başı şuıp töşäçäk», dip cawap birgännär. Mäskäwdä, ber törkem yäşlär ber uq minutqa ber urınğa cıyılıp «Qayda minem taş baqa?» digän süzlär belän ber yulı ayaq astına qarağan.

İnde Qazanda da şulay cülärlänep yörüçelär tabıldı. 1 atna elek 2 yäşlär törkeme İrek mäydanında qara qarşı basıp torğan. Ber yaqtağılar - «Eş ezlim», ikençe yaqtağılar – «Eş täqdim itäm» digän yazular kütärep torğan.

Bu şimbädä Qazannıñ ber yulı ike urında flash mob çarası ütte. Berse - şähärneñ ber kafesı yanında, täräzä qırına keşe cielıp, kafeda aşawıçlarğa 5 minut däwamında tekälep qarap torğan. Ä ikençese - şulay uq keşe küp yöri torğan urında ber törkem Qazan yäşläre bergäläp «xäzer yañğır yawaçaq» dip kükkä qarap torğan.

Bu çaralar tatar yäşlären dä cälep itä. İnternet, elektron poçta yärdämendäge söyläşülär tatarça da bardı. Ğämälgä beraz milli tös kertergä teläweçlär bar. Tatar yäşläreneñ ber uq fiker belän yanıp, ber uq ğämäl başqaru - üzenä kürä milli xäräkät bulır ide.

Bikä Timerova.

XS
SM
MD
LG