Accessibility links

Mäzäk häm cır festivale küñelle uzdı


Comğa könne Qazannıñ UNİKS konsertlar zalında Jır häm Yumor avtorları festivaleneñ yomğaqlaw konsertı uzdı. Bıyıl berençe tapqır oyıştırılğan älege festival'ne “Yadkär” studiäse belän “Avtor” cämäğät oyışması ütkärde. Häm ul 3 kön däwam itte. Festival'neñ berençe köne “Yäşäsen mäzäk... Şaw-şulı tamaşa” dip ataldı. Anda Almaz Xämzin, Rawil Şäräfi, Кamil Kärimov häm başqa küp kenä yumor ostaları xalıqnı kiçe buyı küñelle mäzäkläre belän kölderde. İkençe kön isä “Cırlarım-qanatlarım” dip ataldı. Almaz Xämzin belän İldar Qiämov alıp barğan bu kiçä cır avtorlarına häm cırçılarğa bağışlanğan ide. Äytergä kiräk, programmada Salawat, Xäniä kebek populyar cırçılar iseme bulmağanğadır zal tulı tügel ide. Ämma festival'neñ berençe könenä kilgän tamaşaçılarğa anıñ programması şul xätle oşağan, xätta alar ikençe könne dä kilergä bulğannar. Tağın şunısı quanıçlı, zaldan utıruçılarnıñ kübesen yäşlär ide.

Çınnan da festival' bik küñelle uzdı. Ul bik cılı töstä bardı. Äytergә kiräk, anda küp kenä konsertlarda xökem sörgän bildän tübän mäzäklär dä işetelmäde. Cır avtorları Rezidä Wälieva, İlgiz Zakirov, Rinat Ğöbäydullin, Gölnirä Gabdulla, Vitaliy Agapovqa küp kenä sorawlar birelde. Şulay uq tamaşaçılar da cır avtorlarına üz telägän sorawların citkerä ala ide. Qısqası konsertta bernindi çikläwlär bulmadı. Ul irken töstä bardı. Qayber avtorlar säxnädän üzläreneñ şiğerlären dä uqıdılar. Şuşında uq tamaşaçılar avtorlar häm başqaruçılar xaqında küp yañalıq belde. Mäsälän, küp cırlar avtorı bulğan, qayçandır “Dulqın” radiosında eşlägän Gölnirä Gabdulla, “Dulqın” yabılğaç küptän tügel genä Mäskäwdä açılğan “Watanım” radiosına xezmät itärgä kitkän bulğan ikän. Ämma Mäskäwdä nişläpter ozaq tormağan Gölnirä. “Xäzer min TR Awıl xucalığı ministrlığınıñ matbuğat üzägendä eşlim” - dip belderde ul.

“Änkäy göle”, “Kätük tüti” cırları belän tanılğan, keräşen tatarı Vitaliy Agapov üze turında söyläp kenä qalmadı, cırların üze ük tamaşaçığa da citkerde. Äytergä kiräk, anıñ çığışı iñ küñellelärdä bulğandır möğayın. Şaw-şulı cırları belän bergä ul xalıqnı moñsulandırıp ta aldı. Änilärgä, tuğan cirgä ayırım ber mäxäbbät belän qararğa kiräk dip äytelgän süzläre tamaşaçını beraz mäzäktän çitkä alıp kitep, uyğa qaldırdı. Vitaliy Agapov äle cırlar avtorı häm başqaruçı ğına tügel, deputat häm Çallıda mädäniät buyınça komissiä äğzası da ikän. Başqa avtorlar da üzläre turında küp yañalıqlar söylädelär. Ä alarnıñ cırların tamaşaçılarğa Näfqät Niğmätullin, Aygöl Näbiullina, Aliä İsrafilova, Bulat Niğmätullin häm başqa küp kenä cırçılar citkerdelär.

Festival' avtorlarnı bergä cıyıp, problemalarnı açıqlaw, alarnıñ xoquqların yaqlaw maqsatınnan oyıştırılğan ide. Bilgele, konsert barışında bu xaqta süz äytelmäde. Ämma xalıqqa ul kiräkmi dä. Bu avtorlarnıñ üz probleması. Ä xalıqqa küñelle tamaşa, matur cır kiräk. Häm 3 könlek festival'dän alar monı aldı.

Landış Xarrasova.
XS
SM
MD
LG