Accessibility links

Кайнар хәбәр

Säyäsi firqä häm nämzätlärgä birelä torğan tüläwsez efir säğätläre bülende


Saylaw aldı kаmpaniäseneñ yaña öleşe başlandı. Sişämbe könne Tatarstan üzäk saylaw komissiäsendä, däwlät tele-radio kompaniälärendä tüläwsez häm tüläwle efir säğätlären jiräbägä salu ütkärelde. Tatarstanda da däwlät kanallarında teledebat yäğni turı efirda fiker alışular alıp barılaçaq. Mäskäwdäge belän ber rättän Qazanda da Üzäk saylaw komissiäsendä tüläwsez efir säğätläre bülende. Bülü jiräbägä salı yulı belän başqarıldı.

Respublikada «Tatarstan» televideniese belän radiosı häm «Yaña ğasır» televideniese däwlätneke dip sanala. Şuşı televidenie häm radio kanallar buşlaw efir waqıtın birergä tieş. Qanunda qaralğança, partiä häm bloklarğa 1 säğät birelsä, ayırım nämzätlärgä yartı säğät qaralğan.

Üzäk saylaw komissiäse mäğlümatlarına qarağanda Rusiädä barlığı 23 firqä häm blok terkälgän, alarnıñ 20-se regional` isemleklären buldırğan. Ä 3 firqäneñ Tatarstanda bülekçäse dä, üz nämzätläre dä yuq. Ber mandatlı okruglarda (ä alar respublikada 5äw) 48 keşe terkälgän.

Tüläwsez efir waqıtı, ul firqälär öçen genä buşlay. Alar öçen efir waqıtına däwlät açqa birä. Ägär firqä saylawlarda 2% tawış cıya almıy ikän, ul däwlätkä burıçnı qaytarırğa tieş bula. Mäsälän ütkän saylawlarda «Tınıçlıq häm berdämlek» firqäse belän «Yäşellär firqäse» burıçların qaytarmağan. Sişämbe könne Rusiäneñ Üzäk saylaw komissiäsendä jiräbä salınğanda şuşı ike firqägä bäygedä qatnaşu mömkinlegen birmägännär. Ä Tatarstanda şuşı firqä wäkillärenä jiräbä tartıp qararğa röxsät ittelär, ämma komissiä wäkilläre süzlärençä, däwlätkä burıç qaytarmağan bu sälätçelärneñ kileşülär tözegändä qıyınlıqlar tuarğa mömkin.

Tüläwle efir waqıtı firqä häm nämzätlär arasında alay uq populyar bulmadı. Buşlaw efir bülenep betkäç, jiräbägä salu barğan zal buşap qaldı. «Xalıq» firqäse, «Kommunistlar firqäse», «Tormış», LDPR wäkilläre tüläwle efir säğätlären saylawda qatnaştı, başqa säyäsi köçlär kürenmäde.

Televidenie häm radio kanallar tüläwle efir säğätlären sişämbe könne kiç möstäqil räweştä jiräbäğä salıp bülde. Öndäw häm säyäsi reklama 7nçe noyäberdän başlap, 4nçe dekabergä qädär alıp barılaçaq.

Bikä Timerova.
XS
SM
MD
LG