Äfğänstanda berençe demokratik, prezident saylawları aldınnan 10 millionlap tawış birüçene terkäw 1-nçe dikäberdä başlana.
Monı bügen, Taliban xakimiäte cimerelügä 2 yıl tulğan könne Urtaq saylaw şurası başlığı Zakim Şah iğlan itte.
Saylawçılarnı terkäw uzğan ayda uq başlanırğa tieş ide, ämma aqça citmäw säbäple bu eş kiçekterelde.
Urtaq saylaw şurası sişämbe könne Äfğänstan prezidentı Xämit Karzai oyıştırdı. Aña Karzai tarafınnan bilgelängän 6 äfğän häm BMOnıñ Äfğänstandağı maxsus wäkile Laxdar Brahimi tarafınnan bilgelängän 5 xalıqara äğza kerä.
2004-nçe yılnıñ 20-nçe iyünenä qädär 18 yäşen tutırğan barlıq äfğänlılar terkälä häm prezident saylawlarında tawış birä ala.
Prezident saylawları kiläse yılnıñ iyün ayında ütärgä tieş. Ämma Karzai saylawlar 2 ayğa qädär kiçekterelergä mömkin dide.
