Accessibility links

Кайнар хәбәр

Xikmätle xällär


Bu atnadağı iñ xikmätle xällär saylaw belän bäyle. Kön sayın Tatarstannıñ törle noqtalarında moğcizalar tuıp tordı. Yä vokzal açıla, yä mäktäp safqa basa. Xätta, kürşe tirä yaqnıñ küze kürmägän, qolağı işetmägän su baqçası da Qazanda açıldı. Menä şundıy küñelle yañalıqlar bulsın öçen genä dä saylaw digän närsäne oyıştırırğa kiräkter. Älbättä, saylaw ul talaştırırğa da mömkin. Änä, Kaf tawları artında, Gruziädä parlament sayladılar. Oppozitsiä qänäğät tügel, xakimiät xärämläşte, tawışlarnı döres sanamağan dip uramğa çıqtı. Görcistannıñ mäñgelek citäkçese Şevardnadzeğa da urınınnan kitärgä quşalar. Xätta, Angliäneñ ber professional komandasında uynawçı gruzin futbolçısı da oppozitsiägä quşılıp, qart tölke digän şöhrätle isem alıp, prezidentqa qarşı çığış yasağan. Ägär dä Şevardnadze futbol qırına çıqsa, futbolçı Şota äfände tupnı Eduard abzıynıñ qapqasına kerter ide. Ä bolay xäzergä ul räsmi belderülär belän matbuğatta çığa. Çıqmasqa ni, ul bit kiräk çağında Gruziäneñ cıyılma komandasında Görcistan bayrağı astında da uynıy.

Säyäsätne sportçılar, artistlar üz yöräkläre aşa añlıy. İñ möhime, alar başqalarğa añlata belä. Menä şuña kürä Başqortstan prezidentı saylawlarında fälän kandidat faydasına ügetlär öçen qayber tatar artistların da çaqırğannar. Bu turıda uzğan atnada äytkän idek. Xäzer inde mäğlüm buldı. Gastrol'gä çığıp kitüçelär arasında “räsmi kandidat öçen tügel, ä üzebezneñ millättäş öçen cırlıybız” diüçelär dä tabıldı. Ni äytäseñ, busı inde aqça öçen tügel, möğayın üzläreneñ säyäsi-milli qaraşların yaqlap konsertqa baradır. Bu döres, läkin aqça öçen genä küñeleñ yatmağan kandidatnı yaqlap tatarça cırlap yörü kileşmi. Andıylar da bar, dilär.

Milli canlı, xalqıbız öçen yanıp yörüçelärneñ dä, millätebezne satuçılarnıñ isemnären äytäse kilä. Ämma yaramıy. Namus ta quşmıy, caysız da. Annarı bit möhim fikerne äytü ähämiätleräk. Äläkläşü bezgä kileşmi. Kürgän keşe kürä, namusı bulğanı añlıy.

Änä, näq comğa könne 30-yıllarda üz ätise östennän äläkläp, anı törmägä utırtqan Pavlik Morozovnıñ tuğan köne. Kem ul, Pavlik Morozov bügen? Geroy-pioner tügel, ul ğadi stukaç. Şulay bulıp sotsializmnıñ ber imgäk häykäle bulıp xäterdä qalaçaq.

Ägär dä bezneñ zamannıñ qaharmanına häykäl quyarğa kiräk bulsa, ul pioner Pavlik Morozovnıñ sınına oxşamas ide. İñ kimendä, kesä qarağı, ä bälki annan da citezräk, tıştan qarağanda, ğap-ğadi keşe gäwdäse bulır ide ul. Ämma anıñ ostalıqların nindi genä sınçı kürsätä alır ikän? Änä, Tatarstan şähärläreneñ bersendä administratsiä başlığı uramda üzeneñ tanışın kürep qalğan. Tuqtap, maşinasınnan töşep, trotuarda ber minut qına xäl-äxwälen soraşıp torğan. Äylänep qarasa, 2 million täñkälek “Jeep” maşinası yuqqa da çıqqan. Şunda uq militsiä ayaqqa bastırılğan. Yullar yabılğan, ämma “äx” digänçe rul' artına kerep maşinanı alıp qaçqan keşe barısınnan da citez häm xäyläkär bulıp çıqqan. Äle dä ezlilär ul “Jeep”nı.

Deputatlar arasında da andıylar bar. Dürt yıl buyı Dumada utırıp, Tatarstannı sügep yörgän ber yaqtaşıbız televizor aşa bu atnada borçaq sipte. İmeşter, Çulman aşa küperne dä, Qazan metrosın da ul tözetä, tuzğan toraq programmasın da ul üti. Äyterseñ, Tatarstannıñ här adımına reviziä yasawçı bötenläy başqa keşe bulğan. Ay-hay, mondıy citezlär “Jeep”qa utırıp ta, cäyäwläp tä yıraq kitär. Ägär dä xalıq härwaqıttağıça berqatlı bulsa.

Rimzil Wäli. Qazan.
XS
SM
MD
LG