«Tatarstan - yaña ğasır» xäräkäte säyäsi qiblasın bilgeläde

«Tatarstan - yaña ğasır» xäräkäteneñ qorıltayında başqa säyäsi köçlär cıyılışlarınnan ayırmalı bularaq, Rusiä häm Tatarstan gimnnarı tügel, ğädättä üz köye uynatıla. Läkin şimbä qorıltayında «Yaratqan «Berdäm Rusiä» turındağı cırlar da yañğırap tordı.

Ğ.Kamal isemendäge teatrda ütkän qorıltayda respublika rayonnarınnan kilgän 500läp delegat qatnaştı. Alarnıñ kübese xäräkätneñ cirle bülekçälären wäkilçelek itte. Qorıltaynıñ prezidiumında yulbaşçı Färit Möxämmätşin, Yuğarı Şura äğzäläre Rafail Xakim, Marat Ğäliev utırdı. Tatarstan Prezidentı isemennän Äğzam Ğöbäydullin säläm xatın uqıdı, ä xökümät isemennän qorıltayda vitse-premeyr Zilä Wälieva buldı. Qorıltaynıñ kön tärtibenä ber genä mäs’älä quyılğan ide.:«Saylaw aldı çorında xäräkätneñ säyäsi qiblasın bilgeläw». Färit Möxämmätşin «Berdäm Rusiä» firqäseneñ Tatarstan bülegen citäklägäç, anıñ räislelegendäge xäräkätneñ nindi säyäsi köçkä östenlek birüe ber kem öçen dä ser bulmadı. «Berdäm Rusiä» firqäsen häm Tatarstan prezidentınıñ säyäsi qaraşların tulısınça yaqlawı turında qarar küpçelek tawış belän qabul itelde.

Ä aña qädär xäräkät äğzäläre çığışlar yasadı. Yulbaşçı eşlägän eşläre turında xisap tottı, häm ireşelgän uñışlarnı saqlap qalu öçen bilgele firqä öçen tawış birergä çaqırdı. Xäzerge säyäsi xäl turında «Yaña ğasır»çı Rafail Xäkim çığış yasadı. Tänäfestä Färit Möxämmätşin jurnalistlar aldında çığış yasap, xäräkätneñ ni öçen bu eşkä baruın añlattı. «Xäräkät «Berdäm Rusiä»ne yaqlıy. Rusiä Dumasında 8-10 keşe üz wäkillärebez bulsa, Tatarstan mänfäğätlären yaxşıraq yaqlıyaçaqbız. Saylawlar birgän mömkinlektän faydalanıp qalırga kiräk».

Respublika rayonnarınnan cıyılğan delegatlar aldında «Berdäm Rusiä» firqäsennän nämzät Oleg Morozov çığış yasadı. Firqäneñ federal isemlegenä kergän ikençe nämzät - Anbär Karmeyev ta süz alıp, yäşlärneñ «Berdäm Rusiä»ne yaqlawı turında belderde. Notıq totuçılar arasında berdänber keşe - xalıq deputatı Razil Wäliev ğına tatarça çığış yasadı.

«Berdäm Rusiä» belän saylawlarğa bergäläp barğaç, aña äzerlek eşlärenä «Tatarstan - yaña ğasır» xäräkäte äğzäläre dä cälep iteläçäk. Bu xaqta qorıltaynıñ qararında maxsus cömlä dä buldı. Läkin bu eştä ällä ni qıyınlıq bulmayaçaq, çönki firqädä häm xäräkättä nigezdä ber uq keşelär tora.

Bikä Timerova.