Accessibility links

Кайнар хәбәр

Tatar eşmäkärläre oçraşuı


Küptän tügel Yekaterinburg şähärendä, Tatarstannıñ Uraldağı daimi wäkillegendä ğädäti bulmağan cıyılış, oçraşu bulıp uzdı. Cıyılışqa tege yäki bu ölkädä zur uñışlarğa ireşkän, tormışta üz urının tapqan tatar elitası çaqırılğan ide. Biregä kilüçelär arasında Sverdlov ölkäsendä yäşäwçe bik köçle biznesmennar, törle däräcädäge xakimiät orğannarında eşläwçe çinovniklar häm başqa kürenekle keşelär küp buldı. Äytergä kiräk, alarnıñ küpçelege moña qädär tatar milli ictimaği eşlärendä berqayçan da qatnaşmağan. Xätta arada qul suzıp tege yäki bu çaranı uzdıru öçen aqça sorap yörgän milli aktivistlardan arıp betkän, tupasraq itep äytkändä, alardan mömkin bulğança qaçıp yörüçe biznesmennar da bar ide.

Alarnı biregä cıyunıñ töp maqsatı bulıp Sverdlov ölkäsendä yäşäwçe tatar xalqın tuplaw, berläşterü öçen nıqlı nigez, üzäk buldıru tordı. Äytergä kiräk, ay buyı centekläp äzerlänü buşqa kitmägän – oçraşuğa altmışqa yaqın keşe cıyıldı. Qunaqlarnı başta daimi wäkillek urnaşqan tarixi bina belän tanıştırdılar, alarğa Tatarstan, respublikanıñ soñğı yıllarda ireşkän qazanışları, tatar xalqınıñ märkäze bulğan Qazan turında söylädelär. Annan soñ alarnı zur zalğa, konsert qararğa çaqırdılar.

Küñellärgä ütep kererlek tatar moñın mandolinada Rusiäneñ atqazanğan artistı, Sverdlovski konservatoriäse rektorı wazifasın ütäwçe professor Şäwkät Ämirov başqardı. Qunaqlar şulay uq Tatarstannıñ atqazanğan artistı Xäydär Ğilfanov başqaruında tatar xalıq cırların bik yaratıp tıñladılar. Ä konservatoriä studentkası Güzäl Şaxmatova üzeneñ cırları belän küñellärne bötenläy äsir itte.

Konserttan soñ tügäräk çäy östäle yanında üzara aralaşu däwam itte. Tatar moñı uyatqan milli xislär tä'sireme, ällä bu yortnıñ üzençälekle aurası yärdäm itteme, äñgämä kübräk tatarlılıq, millätne, telne saqlap qalu, berläşü turında bardı. Küp kenä tögäl yullar, mäsälän, TNV sputnik telekanalı tapşıruların çittä yäşäwçe här tatarğa citkerü yulları turında fiker alışular da buldı. Üzara tanışu, aralaşu küplärdä bik uñay tä'sir qaldırdı.

Sverdlov ölkäsendä yäşäwçe tatar eşlekleläreneñ bu cıyılışı berläşü eşendä alğa taba bik zur adım buldı.

Fäwiä Safiullina.Yekaterinburg.

XS
SM
MD
LG