Räsmi Ufanıñ mäğlüm eşmäkär Sergey Veremeyenkoğa qarşı törleçä kirtä qoruwına qaramastan, ul Başqortstan prezidentı bulu öçen köräştä barıber qatnaşır kebek - düşämbe töştän soñ Rusiäneñ Üzäk saylaw komissiäse maxsus şuşı mäs'äläne qarap, Veremeyenko isemen nämzätlär isemlegenä üze kertergä buldı. Bilgele bulğança, Başqortstannıñ üzäk saylaw komissiäse ike monı eşläwdän, yäğni Veremeyenkonı terkäwdän ike märtäbä baş tartqan ide. Mäskäwdäge federal' komissiä qararı belän xäzer Ufadağı saylaw komissiäsenä Sergey Veremeyenkoğa terkäw turında tanıqlıqnı 3 kön eçendä tapşıru kürsätmäse birelä. Aleksandr Veşnyakov citäkçelegendäge Üzäk saylaw komissiäse şulay uq, Başqortstandağı komissiä diqqäten, Mäskäwdän kilgän elekke qararlarğa tieşle ähämiat birmäwenä cälep itä. Alay ğına da tügel, Rusiäneñ Üzäk saylaw komissiäse, Rusiäneñ baş prokuraturasına Başqortstandağı saylawaldı kampaniäseneñ barışın tikşerü, anda törle agitatsiä materialların bilgelängän tärtipne bozıp taratu oçraqların açıqlaw üteneçe belän çığa. Federal' saylaw komissiäseneñ düşämbe qararı şulay itep, Mäskäwneñ Başqortstandağı prezident saylawlarına iğtibarı artuwın kürsätä.
Kärim Kamal, Praga.
Kärim Kamal, Praga.
