Accessibility links

Gruziädä "bärxät inqilabı" - oppozitsiä parlament binasın yawlap aldı


Gruziädä "bärxät inqilabı" bara - oppozitsiä tarafdarları berniçä säğät elek Tbilisidäge parlament binasına bärep kerep, anı tulısınça yawlap aldı.

Parlamentnıñ utırışlar zalında şul çaqta, yaña ğına saylanğan deputatlar qarşında prezident Eduard Şevardnadze üze çığış yasıy ide. Zalda berençe bärep kerüçelär kürenü belän prezidentnıñ tän saqçıları Şevardnadzene şunda uq mönbärdän ayırıp binadan alıp çığıp kitte.

Audio

Buşap qalğan mönbärgä oppozitsiäneñ töp citäkçese Mixail Saakaşvili kütärelde, qawşap qalğan deputatlarğa häm zalğa ütep kergän tarafdarlarına ul, "Gruziädä bärxät inqilabı bara" dip belderde. Anıñ süzlärenä qarağanda, oppozitsiä köç qullanunı kire qağa. Çınnan da, Tbilisidäge wäzğiat älegä tınıç bulıp qala birä. Xäbärlärgä qarağanda, başqalada häm xätta anıñ üzägendä dä bertuqtamıy transport eşli, ğädättän tış wäzğiat bilgeläre sizelmi. Mixail Saakaşvili çığışınnan soñ prezident Şevardnadzene yaqlağan partiälärneñ deputatları parlament binasın taşlap kitte häm anda xäzer tulısınça oppozitsiä tarafdarları xökem itä. Läkin näq şunı uq bar il, andağı xakimiatneñ kem qulında buluwı xaqında äytep bulmıy, Ğomumän, täräqqiatneñ nindi yünäleştä kitüwe hiç bilgele tügel. Eduard Şevardnadze prezidentlıqtan waz kiçmiäçägen belderä, parlamenttan kitkändä ul, "min monı üzemneñ mötdätem tulğaç qına eşliäçäkmen" dip äytte. Anıñ wäkile parlamenttağı xällärne inde "qorallı fetnä" dip bäyäläde. Yaqınça ber säğät elek yañadan telekameralar qarşına çıqqan Şevardnadzeneñ ildä "ğädättän tış xäl" iğlan itüwe mäğlüm buldı. İminlek köçläre häm ğäskärneñ qaysı yaqnı aluwı bilgele tügel. Tağın ber çetrekle mäs''älä - Acarstan mäs''äläse. Gruziädä şaqtıy kiñ möstäqillekkä iä bulğan şuşı respublikanıñ citäkçese Aslan Abaşidze prezidentnıñ oppozitsiä belän qarşılığında Şevardnadze yağın alğan ide. Ägär dä Tbilisidä xakimiatkä oppozitsiä kilsä, Acarstan belän mönäsäbätlär nindi bulır, ul ikençe Abxaziä bulmasmı digän soraw tua. Mäğlüm ki, formal'' töstä Gruziäneñ öleşe sanalğan şul ikençe respublika, Abxaziä, inde 1991-nçe yıldan birle asılda Gruziädän ayırılıp yäşi. Ul arada oppozitsiä ilneñ yaña prezidentı itep, parlamentnıñ elekke citäkçese Nino Burcanadzene iğlan itüwen belderde.

Kärim Kamal
XS
SM
MD
LG