Bıyıl Mäskäwdä Ramazan ayına mäğlümät çığanaqları tarafınnan ayırım iğtibar buldı. Ägär de Ramazan ayı başlanır aldınnan, bu izge ay xaqında täfsille mäglümät alu teläge belän “Ria Nowosti” ağentlığı matbuğat konferensiäse ütkärgän bulsa, xäzer inde bäyräm aldınnan 24 noyabrdä şundıy uq matbuğat konferensiäsen “Arğumentı i faqtı” ğäzetäsı ütkärde. Häm ul konferensiälärnen här ikesendä dä jurnalistlar belän Rusiänen Yevropa öleşe dini idaräse häm Rusiä möftilär şurası räise Rawil xäzrät Ğaynetdin oçraştı. Telewidenie, radio häm ğäzetä- jurnal redaqsiälärennän kilgän jurnalistlarnı Ramazan bäyräme genä tügel islam belän bäyle räweştä xalıqara xäl dä , Törkiädä bulğan şartlatular da häm xöqumätnen islamğa qaraşı da qızıqsındırdı. Şul uq waqıtta jurnalistlar başqa illärdän, birgäk tä BDB illärennän quçep kilgän moselmannarğa Dini idarä tarafınnan qursätelgän yärdäm turında da soradılar. Mäçetlär tözeleşenä kilgändä, Rawil Ğaynetdin, xäzerge waqıtta mäçetlär elekke zamannarda berqayçan da mäçet bulmağan töbäklärdä, Rusiänen tönyağında Murmanskiy, Voloğda, Arxangelsk, Komi respubliklarında tözelä başladı dip belderde. Şulay uq ul İslamnıñ dönya siwilizätsiäsenä kertkän öleşe xaqında da söyläde. 25 noyabrdä barlıq möselmannar öçen Mäskäwdä dä bäyräm namazı bulaçaq. Häm ul telewideniedän dä kürsäteläçäk. Bäyräm belän qotlaw telegrammaları inde kilä başladı. Buğen genä şundıy qotlawlarnı Rusiä xökümätennän dä aldıq, ä inde Mäskäwlelärne bäyräm belän qotlarğa Yüriy Lujqov üze kiläçäk dide, Rawil Ğaynetdin. 25 noyabrdä kiç belän bäyräm uñayınnan Prağa restoranında olı qunaqlarnı, çit il ilçelären qabul itü dä bulaçaq. Rawil Ğaynetdin bezneñ radionı tıñlawçılarnı häm ul barlıq möselmannarnı da zur bäyräm- Ramazan ğayete belän qotladı.
Näzifä Kärimova, Mäskäw
Näzifä Kärimova, Mäskäw
