Ber ğibrätle küreneş tä iğtibarğa layıqtır: ölkä üzägeneñ här mäçetendä häm qayber awıllarda Tatarstan möftie Ğosman xäzrät İsxaqinıñ täbrik süze bäyän itelde häm anıñ tarafınnan äzerlängän wäğäzlär uqıldı.
Şähärneñ ike mäxälläse bıyılğı bäyrämdä berençe märtäbä ör yaña mäçettä ğäyet uqıdılar. Timeryul rayonı mäxälläse yaz köne genä yaña mäçetkä kergän ide. Aña qädär ike vagonğa da sıymağanğa, ğäyet namazları berniçä märtäbä uqılıp kilde. Bıyıl, şöker, qısan bulsa da, barısına da urın tabıldı. Ä Mostovaya bistäsendäge din qardäşlärebez märxüm Şaqircan xäzrät üz yortı yanında – baqçasında tözep qaldırğan mäçettän köz köne genä yaña mäçetkä küçtelär. Elekke binağa - yaqın toruçılar ğına yöri.Bıyılğı Ramazan ayınıñ tağın ber üzençälege – xalıqnıñ Täräwix namazına küpläp yörüe. İñ küñellese şul: balaların, onıqların täräwixqa alıp kilüçelär dä işäyä bara. Räsmi tanılmağan, ämma xalıq arasında oluğ abruy yawlağan Fatix xäzrät Aliullov fikerençä, xatın-qızlarnıñ da mäçetkä tartıluı bik tä uñay häm möhim küreneş. Çönki, di ul, yäş buınnı tärbiäläw näq xatın-qızlar qulında. Häm baladan kem üsäçäge dä annan tora.
Ramazan ayında här mäçettä İftar kiçäläre oyıştırıldı. Qayberlärendä bişär märtäbä. Öç mäçettä Täräwix namazları waqıtında Qor'än Kärimne tulayım qıçqırıp uqıp çıqtılar. Ä Mostovaya bistäsendä – Qor'än täfsiren. İmam Änwär Xuciev äytüençä, monıñ näticäsendä üzläreneñ küp yalğışların tözätkännär, küzläre açılğan, Allahqa yaqınayğannar.Vırıpay bistäsendäge “An-nur” mäçetendä uzğan täräwix namazlarına xalıq ayıruça işle yörede. Monıñ säbäben bistädä Çüpräle rayonınnan kilep urnaşqan millättäşlärebezneñ çağıştırmaça uqmaşıbraq yäşäwennän kürälär. Xalıqnıñ küplege, kiläse yılda mäçet binasınıñ ikençe qatın tözergä mäcbür itä, di möäzzin Şamil xäzrät Şäyxelislamov. Läkin bu – şatlıqlı burıç, xalqıbıznıñ dingä yaqınayuına tä'sir itü öçen tırışu – üze ber bäxet. Tağın ber quanıçlı küreneş: bu mäçettä bik ozaq ızğışlar bardı. Döresräge, çittän oyıştırıldı. Nihayät, moña çik quyıldı. Şulay uq ızğışlardan iza çikkän Yaña şähär mäçetendä dä tınıçlıq xökem sörä.
Ramazan ayınıñ tağın ike büläge. Elegräk eşläp kilgän, ämma aqça yuqlıqtan yabılğan “Yoldızım” isemle televizion tapşıru kire qayttı. Kürenekle maltabar İlgiz Nasibullov TNT kanalında yıl buyı atnasına 10 minutlıq waqıt satıp alğan. Berençe wäğäz belän Fatix xäzrät 21-noyäberdä çıqtı. Häm ul qabatlap ta birelde äle.İkençe büläk qatnaş xalıqlı Skugareyevka awılı fermerları Räşit Möxämmätev belän Minzahit Alimovtan. Alar Ramazan ayı urtalarında mäçetkä cılılıq kerttelär. Monıñ öçen 200 metrlıq torba saldılar. Awıl möselmannarı bu ike uñğan yegetkä tirän räxmätlär belderde.
Ayrat İbrahim, Sember.
