Tatarstan Däwlät Şurası räise Färit Möxämmätşin citäkçelegendäge delegatsiä Ufadan Qazanğa qaytıp citte. Şunıñ belän bergä, Tatarstanda «Berdäm Rusiä» firqäse wäkileneñ Başqortstandağı oçraşularına berençe reaksiä kürende. Tatar xalqı çıdam häm sabır xalıq. Millättäşlärebez Görciä xalqı kebek uramğa bärep çıqmas.
Ämma Tatarstan Däwlät Şurası räise citäkçelegendäge wäkilçelekneñ Ufada Başqortstannıñ räsmi xakimiätläre belän oçraşıp yörüenä qänäğät bulmawçılar da bar.
Başqortstandağı xäbärçebez söylägänçä, Färit Möxämmätşin, çärşämbe könne üzeneñ Başqortstandağı kollegası Konstantin Tolkaçev belän oçraştı häm parlament ara xezmättäşlek turında kileşügä qul quydı. Şunıñ belän bergä, Tatarstan delegatsiäse «Nur» tatar teatrında zur zalnı açu tantanasında qatnaştı. Şuşı säfär häm anda äytelgän süzlärgä Qazanda berençe reaksiä dä kürende. Menä mäsälän, kürenekle publitsist, «Azatlıq» radiosınıñ daimi tıñlawçısı Mäxmüt Äxmätcanovnıñ fikere.Parlament ara xezmättäşlek, normal` äyber. Ämma ni säbäple anı saylawlarğa ber atna qalğaç qına çaqırğannar ikän. Bu Raxitovqa saylanırğa yärdäm itü bula tügelme soñ? Andağı tatarlarnıñ küzläre yomıq bulmasa, alar mondıy barularğa ğına bireşep tormas.
Tağın ber fikerne işetergä turı kilde Qazanda. İsemnären tanıtırğa telämägän tıñlawçılar äytkänçä, Färit Möxämmätşinnıñ Başqortostan Prezidentı Mortaza Räximov belän bergäläp teatr zalın açıp yörüe, tatar mänfäğätlären yaqlawğa ömet itkän saylawçılarnıñ citäkçelärgä dä, «Berdäm Rusiä» firqäsenä dä ışanıçın kimetergä mömkin.Bikä Timerova.
