Accessibility links

Кайнар хәбәр

Uzğan atnada Mäskäwdä Tatarstan matbuğatına, mädäniätenä iğtibar küp buldı dip äytergä bula


Uzğan atnanı Mäskäwdä Tatarstan matbuğatı atnalığı dip tä atarğa bulır ide. İñ berençese Mäskäwdä “Bibliosfera” kitap kibetendä tatar kitabı bülegeneñ tantanalı açılışı buldı, ikençedän, Kürgäzmälär üzägendä açılğan “Rusiä matbuğatı 2004” kürgäzmäsendä Tatarstannıñ barlıq näşriätläre dä qatnaştı, häm anda yaña çıqqan kitaplardan başlap, gazeta jurnallar belän dä tanışırğa mömkin ide. Uzğan atnada Tatarstannan kilgän tağı ber kürgäzmä Qazannıñ 1000 yıllığına bağışlanğan fotoräsem kürgäzmäse eşli başladı. Mäskäwdä bolardan başqa da küp törle çaralar uzdı. Xäzer şular xaqında täfsilleräk mäğlümat.

Mäskäwneñ “Bibliosfera” kitap kibetendä tatar kitapları da bulaçağı xaqında xäbärlär küptän yöri ide. Nihayät 28nçe noyäber könne bu bülekneñ tantanalı açılışı da buldı. Bu täqdir itü oçraşuında Qazannan “Tatmedia” agentlığı direktor urınbasarı Färit Şagiaxmetov, Tatarstan kitap näşriäte direktorı Damir Şakirov, Bauman uramındağı kitap kibete direktorı Elmira Velkova, yazuçı Mösäğit Xabibullin, Federal' Cıyınnın Tatarstannan federatsiä şurası äğzäse İrina Laroçkina, Tatarstannıñ wäkälätle wäkillege xezmätkärläre häm küpsanlı mäskäwlelär dä qatnaştı. Täğdir itüne “Bibliosfera” kitap kibete direktorı Nelli Älfir qızı Piçugina açıp hibärde. Qayber mäglümatlarğa qarağanda Nelli xanım çığışı belän Ulyanovskiy ölkäseneñ Çardaqlı rayonınan ikän. Häm bu kibettä tatar kitapları satıla başlawda da anıñ tatar millätennän bulu öleşe bar. Çönki tatar kitapların başqa kibetlärgä täqdim itep qarasalar da, anda tulı ber bülek birergä rizalıq birmägännär. Üzeneñ çığışında “Bibliosfera” kitap kibete direktorı Piçuğina bezneñ kibetlär çeltäre şulay uq Ufada cäm Çabaqsarda, Ästerxanda, Perm ölkäseneñ Berezniki şäcärendä da açıldı. Bez andağı kibetlärebezgä dä tatar kitapların quyaçaqbız dip, süz birde. “Bibliosfera” kitap kibetläre çeltäre Rusiäneñ tağı küp kenä şähärlärendä eşli başlağan. Alar arasında Stärletamaq, Penza, Perm, Sarıtaw häm başqa şähärlär dä bar. Bu sanap ütkän şähärlärdä tatar xalqınıñ küpläp yäşägänen iskä alsaq, tatar kitapları anda da barıp citärgä mömkin dip äytergä bula . Mäskäwdä tatar kitabı bülege açılu uñayınnan Qazan kitap kibete direktorı Velkova El'mira xanım “Bez bu waqiğağa ber yıl buyı äzerländek. Küp kibetlär bezdän baş tarttı. Barı tik biredä genä aça aldıq. Monda direktordan başqa da tatar qızları eşli. Alar bezgä bik bulıştılar dide. Häm kitaplarnıñ teläsä nindi zäwıqne känäğätländererlek däräcädä eçtälek yağınnan da bizäleş yağınnan da yuğarı sıyfatlı buluın äytep kitte. Qubräk iğtibar tarixi kitaplarğa birelä, äle bez keşelärdän ni belän qızıqsınuların da açıqlarğa uylıybız,”- dide.

Şul uq könne, 28nçe noyäberdä “Pressa 2004” kürgäzmäsendä Tatarstan köne ide. Şul uñaydan anda matbuğat konferensiäse dä ütte. Matbuğat konferensiäsenä kitap kibete täqdir itüendä dä qatnaşuçılar barısı da kilep ölgerdelär. Biredä gazeta jurnal redaktorları çığış yasap, üz basmalarnıdağı yañalıqlar xaqında söylädelär. Mäsälän, “Söembikä” jurnalı möxärrire Firaya xanım ayırım basma itep, öç ayğa ber märtäbä “Asılyar” hurnalı çığa başlawın xäbär itte häm anıñ berençe sanı belän tanıştırdı. Şulay uq matbuğat konferensiäsendä “Qazan”, “Yalqın” jurnalları möxärrirläre dä qatnaştı. Konferensiädä çığış yasağan, Mäskäwdä inde 11nçe yıl ütkärelep kilgän “Pressa 2004” kürgäzmäseneñ direktorı Nenaşev, Tatarstan kitaplarınıñ matur bizäleşenä, poligrafiä yağınnan sıyfatlı buluına igtibar itkän. Häm ul Tatarstan näşriäte alıp kilgän kitap, jurnal , gazetalar üzläreneñ sıyfatı belän beznen kürgäzmäneñ däräcäsen kütärde dip belderde. Bu kürgäzmägä kilä almağan mäskäwlelär anda kürsätelgän kitaplarnıñ küpçelegen “Bibliosfera” kitap kibetendä satıp alırğa mömkin. Mäskäwdä atna buyı tağı ber kürgäzmä, Qazannıñ 1000 yıllığına bağışlanğan fotoräsemnär kürgäzmäse eşläde. Monda Qazan fotorässämnäreneñ iñ kürkäm eşläre quyılğan häm kürgäzmä “Kazan`- Ştrixi k portretu” dip atalğan ide.

Äytkänemçä, Mäskäwdä 28nçe noyäber könne ütkän çaralar anıñ belän genä tämamlanmadı. Mäskäwneñ 1186 sanlı tatar etnokul'tura yunäleşendä eşlägän mäktäbe “Qaz ömäse” dip atalğan kiçä ütkärde. Uquçılar häm uqıtuçılar kollektivı kiçägä kilgän qunaqlarğa “Qaz ömäsendä awlaq öy” digän säxnä äsäre kürsättelär. Bıyıl ğına bu mäktäptä näfis süz däresläre alıp bara başlağan estrada artistı Bärxät Gäräy qunaqlarğa onıtılmaslıq spektakl' äzerlägän ide. Qaz qanatları belän bizälgän säxnä türenä

Qaza ömäse baylıq, mullıq bäyräme

Kiñräk bulsın.

Kübräk bulsın

Küñel açu mäydanı

Közge baylıq, közge mullıq

Awılda qaz ömäse,

Şaw-gör kilä hämmäse!

digän şigri yullar yazılğan. Häm kiçä “Qaz qanatı” cırı belän başlanıp kitte.

Kiçädä şulay uq Qazannan matbuğat kürgäzmäsenä kilgän qunaqlardan “Yalqın” jurnalınıñ baş möxärrire Elmira Zakirova häm jurnal xezmätkärläre qatnaştı. Alar mäktäpkä jurnalnıñ berniçä sanın buläk tä ittelär. Tamaşa soñında qunaqlarnı qaz şulpası häm qaz itennän peşerelgän törle sıy, rizıqlar belän sıyladılar.

“Azatilıq” radiosı öçen Mäskäwdän Näzifä Kärimova

XS
SM
MD
LG