2nçe dekaber könne “Bötendönya tatar kongressı” Xalıqara berlege çaraları däwam itte. Qazan milli-mädäni üzägendä “Tatarstannıñ eşlekle partnerları” digän forum uzdı. BDB illärendäge häm Rusiä töbäklärendäge Tatarstannıñ säwdä-sänäğät wäkilçelekläreneñ häm tatar eşmäkärläreneñ inde bu dürtençe cıyını. Cıyınnı premyer-ministr Röstäm Miñnexanov alıp bardı. Kereş süzendä ul Tatarstannıñ 28 BDB illäre häm Rusiäneñ 65 töbäge belän xökümätara säwdä-iktisadi kileşüläre buluı turında äytte. Säwdä Häm tışqı iqtisadıy xezmättäşlek ministrı Xafiz Salixov illär häm töbäklär belän xezmättäşlektä respublika mänfäğätläreneñ yıldan yıl artuın häm kiñäyüen sannar belän isbatladı. Soñğı öç yılda Tatarstan produktsiä citeşterü tempları buyınça Rusiädä berençe urınnarğa çıqqan. Citeştergän produktsiäne satası bar. Xökümät monı yaxşı belä häm çaraların da kürä. Soñğı 3-4 yılda ğına Rusiä töbäklärendä Tatarstan 25 säwdä yortı häm 10 säwdä-iqtisadi wäkilçelek açqan. Çığışlardan añlaşılğança xökümät häm wäkilçeleklär bu eşlärneñ näticäse itep iqtisadi maqsatlarnı ğına kürälär. Mäskäwdäge wäkil Näcip Mirixanovnıñ fikere. Näcip Mirixanov Tatarstan xökümäteneñ säwdä-iqtisadi bağlanışlarda tatar eşmäkärlegen qullanunı millätne berläşterüneñ ber çarası dip xuplıy. Läkin bu bağlanışlarnı konkretlaştıru, Tatarstannan da konkret täqdimnär kötelüen äytte. Çığışlarda milli biznes häm anıñ millätne kütärüdä yärdäme mäs’äläse dä yañğıradı. Bötendönya tatar kongressı başqarma komitetı räise Rinat Zakirov bik tormışçan sxema täqdim itte. Tatarstan çittä yäşäwçe eşmäkär millättäşlärebezgä uñışlı säwdä alıp barırğa yärdäm itä, ä eşmäkärlär kergän faydalarınnan cirle tatar cämğiätlärenä mädäniätne mäğärifne üsterüdä matdi yärdäm kürsätälär. Rinat Zakirov Rusiä töbäklärendä ütkärelgän çaralar telneñ mädäniätneñ yuqqa çığa baruın kürsätälär dide. Şuña kürä ul tatar eşmäkärlären mäçetlär saludan tatar mäktäpläre saluğa, oyıştıruğa küçärgä çaqırdı. Biznesnıñ milli tösmerle bula aluın yaqlap Sarıtaw wäkile Zöfär Xäkimov milli xislär belän suğarılğan çığış yasadı. Eşlekle çığışlar häm täqdimnär tügäräk öställär dä däwam itterelde. Tatarstannan çittä yäşäwçe tatar eşmäkärläre cıyınına respublikanıñ “Tatneft'”, “Tübän- Kamaneftexim” “Kamaz“ kebek ere şirkätlär citäkçeläre çaqırılğan ide.
Yunıs Ätnäle.
