”Ufaneftexim” zavodı avtobusları 600 tawış kiterde

Uzğan şimbä häm yäkşämbe könnärendä Başqortstanda bulırğa turı kilde.Comğa könne ike qärdäşem belän maşinada yulğa çıqtıq. Tatarstan çigen uzu belän, Başqortstanğa kergäç tä yulda militsiäneñ küp buluı iğtibarnı cälep itte. İleş rayonı üzäge Yärkäygä kilep kergändä dä, anı çığıp kitep azraq barğaçta , Dürtöyle çatında da , Kuşnarenkoda da Ufağa kilep kergändä dä maşinabıznı militsiä xezmätkärläre tuqtatıp, centekläp tikşerde.Comğa kiçendä, döresräge 6 dekabergä qarşı töndä, isän- saw Ufağa kilep cittek. 7 dekaberdä Rusiä Däwlät Dumasına saylawda qatnaşu öçen, Qazanda otkrepitel'noe udostoverenie- başqa urında tawış birü tanıqlığı alğan idem. Şuña kürä saylawlarda qatnaşıym äle digän uy belän, yäkşämbe könne irtän Ufa şähäreneñ üzägendäge Oktäber prospektındağı, 106 mäktäptä urnaşqan saylaw uçastogına kildem. Koridorda, saylap çıqqan keşelärgä:“ Sez sayladığızmı? Mägez küçtänäç!- dip, çäy, şokolad, soq taratıp toruçılarnıñ süzläre küñelne qıtıqlap aldı. Ämma küçtänäçne saylap çıqqannarğa ğına birälär ide.

Saylaw kabinasınnan çığuğa, zalğa bik küp keşe ağılıp kergänen kürdem. Alar belän söyläşep alırğa buldım. “Bezne saylawğa avtobuslar belän “Ufaneftexim“zavodınnan cibärdelär,”-diep üzläreneñ rizasızlıqların belderdelär.

Saylaw komissiäse wäkilläre 600ләп keşe kiläçäk didelär. Bolar barısıda şulay , minem kebek otkrepitel'noe udostoverenie belän saylawçılar bulıp çıqtı. Saylaw komissiäse räise menä närsälär äytte:Bu keşelärne min belmim. Bolar bezneñ saylawçılar tügel. Ämma bezgä saylaw qağidälären öyrätkändä äyttelär , başqa urında tawış birü tanıqlığı belän küpme keşe kilsä dä, sez alarnı saylatırğa tieşsez”- dip.Saylawlar berençe turda tämamlanmasa, alar şuşı yäşel tanıqlıq belän ikençe turda qatnaşaçaq”-dip añlattı saylaw komissiäse räise.

Bu keşelär Ufa şähäreneñ çitendä urnaşqan “Ufaneftexim” zavodınnan avtobuslar belän kiterelgän zavod eşçeläre bulıp çıqtılar. Alarnıñ qulında ike törle başqa cirdä tawış birü tanıqlığı bar ide. Berse- bar Rusiä keşelärenä birelä torğan “yedinoğo obrazsa” tanıqlıq bulsa, ikençese, yäşel töstägese- prezident saylawına. Häm şul yäşel töstägeseneñ töp öleşen saylaw uçastogında cıyıp baralar ,ä ikençe yartısın saylawçılarnıñ qullarına tottıralar ikän. “Sezgä bu yäşel käğäz ni öçen kiräk? digän sorawğa, alar :“Eştä soradılar, eşkä alıp kilergä quştılar ”-didelär.

Nişläp ber respublikada yäşäwçelärneñ qayberläre prezident saylaw buyınça ber tawış birü tanıqlığı , ä ikençeläre başqa töstäge tanıqlıq totıp kilgänen açıqlap bulmadı. İke tanıqlıq totıp kilüçelär zavodta eşläwçelär. Alarnı avtobus kiterä häm alıp kitä. Xälbuki, bu könne alar zavodta eşlämäsä dä. Predpriätie tawış birüne oyıştıra digän närsä şul bula torğandır inde. Saylaw uçastogınnan çıqsam, mäktäp yanında çınlap ta “Ufaneftexim” ul Suvorova, “Vaxta” dip yazılğan avtobuslar tora ide. Alar ni öçen kilgän, ni öçen ber zavod xezmätkärlären bergä alıp kitä, monısı bolay da añlaşıla ide. Matdi könküreş yaqtan stimullap, säyäsätkä, keşeneñ kem öçen tawış birüenä dä tä'sir itep bula ikän. Bu täcribäne ber qayda da kürgän yuq ide.

Azatlıq radiosı Mälikä Basıyr Qazan.