Accessibility links

Başqortostanda oppozitsiägä 70% artıq tawış birgän rayonnar bar


Başqortstanda prezident saylawlarında kemneñ küpme tawış cıyuı milli cämäğätçelektä zur qızıqsınu uyattı.Çönki anda äle saylawlarnıñ ikençe turı bulaçaq. Xalıq kemgä kübräk ışana, räsmi xakimiätkäme, ällä oppozitsiädä toruçı nämzätlärgäme. Kem ciñär soñ?

Ğomumän tatarlar yäşägän töbäklärdä Başqortstan prezidentın saylawı bik aktual'. Samaradan Başqortstanğa barğan küzätüçelär turında sez Şamil' Bahautdinnıñ xäbären işettegez inde. Bu küzätüçelär Başqortstannıñ Şaran rayonında bulğannar.

Ä menä Ralif Safinnıñ tuğan rayonı, İleştä yaqtaşları niçek tawış birgän soñ? Xäzergä räsmi mäğlümatlar bulmasa da, rayonda yäşäwçelär, bigräk tä saylaw komissiäsendä qatnaşuçılar, küzätüçelär näticälärne belä. Alarnıñ fiker xäbärläre Qazanğa da kilep citä. Azatlıq radiosı Qazan byurosı belän İleş rayonındağı küzätüçe Rämil' häm Färit äfändelär elemtägä kerdelär. Alarnıñ tawışların üzegez dä tıñlıy alasız:

“İleş rayonında saylawçılar bik aktiv buldılar. R.Safinğa -70%tan artıq, M.Räximevqa-27%tan artıq, S. Veremeenkoğa -1%tan artıq tawış birdelär. Küzätüçelär Penzadan, Ul'yanovskiydan, Ufadan, Saratovtan, Tatarstannan kilgännär ide. “Yedinstvo”firqäsen yaqlawçılar, Kvyat, Safinnı, Generalovnı yaqlawçılar kildelär. Rejim belän köräşergä turı kilde inde”-didelär küzätüçelär.

Dimäk, İleş rayonında oppozitsiä wäkilenä 70 protsenttan artıq tawış birgännär, M.Räximovnı 27 protsentlap saylawçı xuplağan. Nindi millät wäkilläre soñ alar - räsmi xakimiätne xuplamawçılar? İsegezgä töşerik- 1989nçı yıldağı canisäp näticäläre buyınça İleş rayonında yäşäwçelärneñ öçtän ber öleşe genä tatarlar. İleşlelärneñ 67 protsentı başqort dip yazılğan ide. Uzğan yılğı san alu waqıtında başqort itep yazıluçılar sanı tağın da artqan dilär. Şulay da İleşlelär tatar telendä söyläşä, üz millätennän waz kiçmi. 7nçe dekaberdä alarnıñ 70 protsentı respublikanıñ räsmi säyäsätenä qarşı tawış birgän. Milli säyäsät belän rizasızlıq menä şunda çağıla dip uylarğa urın bar.

Azatlıq radiosı Mälikä Basıyr, Qazan.

XS
SM
MD
LG