Yekaterinburg şähärendä urnaşqan Raxman mäçete problemaların çişü maqsatı belän mäçetkä yärdäm itü sovetı tözelde. Xäteregezgä töşerep ütäbez: xalıq bik yaratıp häm teläp yöri torğan, yäş buınnı din-äxlaq yulına bastıru eşe cayğa salınğan Raxman mäçete, tözekländerelgän taşlandıq mäktäp binasında urnaşqan bulğanğa kürä, äledän-äle xucalıq itü yağınnan awırlıqlarğa oçrap tora. Küptän tügel biredä yağulıq sistemasın üzgärtep qordılar. İñ tıynaq isäpläwlär buyınça, bu eş mäçet cilkäsenä 200 meñ sumğa töşte. Mondıy aqçanı ciñel genä tabu mömkin tügel, Qızğanıç, küp kenä eşquarlar din uçaqları bulğan mäçetlärneñ moxtaclıqlarına bik iğtibar birep betermilär. Ämma bu oçraqta din ähellärenä biznesmennarnıñ iğtibarın beraz cälep itü mömkin buldı. Ramazan bäyrämendä mäçetkä kilgän Milli Media-Xolding citäkçeläre biredäge moxtaclıqlarnı üz küzläre belän kürdelär, häm mäçetkä yärdäm itü sovetı tözü maqsatı belän başqa eşquarlarğa möräcäğät belän çıqtılar. Şulay itep, matdi problemanı öleşçä çişü nasıyp buldı. Burıçnıñ küp öleşen Qazıylat idäräse qapladı.
Raxman mäçeteneñ imamı Ruslan xäzrät belän oçraşqan çaqta, Milli Media-Xolding citäkçeläre küp kenä milli-mädäni çaralarnı bergäläp ütkärergä dip süz quyıştılar. Äytik, dekaber ayında ütkäreläçäk Milli Media-Xolding stipendiatları bulğan sälätle balalarnıñ çirattağı oçraşuına Ruslan xäzrätne dä çaqırırğa uylıylar. Alar uylawınça, ata-babalarıbıznıñ izge dine, yolalar belän balalar tanışa başlarğa tieş. Monnan tış, milli häm dini tärbiä buyınça Raxman mäçete belän bergä urtaq eş plannarı qorıp, alarnı tormışqa aşıra başlaw da küzdä totıla.
Utırıp söyläşülärneñ tağın ber faydalı yağı kilep çıqtı: mäçetlärneñ matdi xälen yaxşırtu buyınça küp kenä qızıqlı täqdimnär kertelde. Mäçetlär nigezendä matdi çığımnarnı tä'min itärlek küp kenä eşlär oyıştırırğa bula. Alar arasınnan xäläl it, dini atributqa satunı bergäläp oyıştırunı başlap cibärü bu zur eşneñ berençe adımnarı bulaçaq.
