Accessibility links

Saylawlardan soñ sanaşu


Rusiä Däwlät Dumasına saylawlardan soñ näq ber atna ütkäç, xäzer inde şuña yomğaq yasala. Qänäğät bulmağan häm saylawda xärämläşügä räncegän nämzätlär haman şiqäyät itep, mäxkämä yulında yöri. Ä saylaw komissiäläre, ciñep çıqqan firqälär qänäğätlek xise belän kiläçäkkä plannar qora.

Dumada Tatarstannıñ saylaw okruglarında saylanğan 5 deputat utıraçaq. Şunnan başqa, partiä isemlege buyınça tağı 6 yäki 7 deputat Tatarstannıñ wäkile bulaçaq. Şunıñ östäwenä, elekke Dumada deputat bulğan Färidä Gäynullina da arbadan töşep qalmadı. Ul “Единая Россия”neñ Saratov töbäge isemlege aşa Dumağa saylanğan. Xäzer inde ul sarıtawlılarnı kübräk yaqlarmı, Tatarstannı da istä totarmı dip baş watarğa qala. Xäyer, Sarıtawda da tatarlar az tügel.

Dumağa saylaw häm anda rus millätçeläre, sul köçlärneñ öskä çığuı Tatarstan parlamentınıñ eşendä dä beraz çağıldı. Düşämbe könne açılğan Tatarstan Däwlät Sovetınıñ sessiäsendä Aleksandr Ştanin saylaw waqıtında üzeneñ häm başqa nämzätlärneñ nindi qıyınlıqlar kiçerüen, räsmi firqäğä östenleklär birüen açınıp söyläde. Sessiädä qatnaşqan Mintimer Şäymiev Ştanin belän bäxäskä kerep, üzeneñ demokratlar häm uñ köçlärneñ Dumağa ütä almawına borçıluın belderde. Tatarstan prezidentı fikerençä, СПС, Яблоко citäkçeläre üzara tınışıp, oyışqan räweştä eşlämilär. Bu ciñelüneñ säbäplären açıqlarğa häm kiläçäktä xatalarnı qabatlamaw öçen çaralar kürergä kiräk, dide ul. Çınnan da, ägär dä mart ayında Tatarstan Däwlät Sovetına saylawlar waqıtında ЛДПР, Родина, КПРФ kebek firqälär üz wäkillären Tatarstan parlamentına kertep tutırsalar, demokratiäne häm Tatarstan respublikasınıñ statusın yaqlawçılar küpme genä bulır ikän.

14nçe martta Rusiä prezidentın saylaw belän beryulı Tatarstannıñ Däwlät Sovetına deputatlar da saylanaçaq. Düşämbe könne ütkän sessiädä yaña parlament, däwlät Sovetı deputatları eşçänlegenä bäyle proyektlar tikşerelde.

XS
SM
MD
LG