Accessibility links

Кайнар хәбәр

Rusiädä demokratiä can täslim qıla, bu kem probleması?


Düşämbe könne Rusiäneñ üzäk basmalarında, ildäge demokratik oppozitsiä can täslim qıldı axrı digän eçtälektä mäqälälär dönya kürde, xörmätle tıñlawçılar. Atna azağında mäğlüm "Yabloko" partiäse kiläse prezident saylawlarına üz nämzäten çığarmayaçağın belderde. Elegräk Sul köçlär berlege SPS ta şundıy qararğa kilä aluwı xaqında äytkän ide. Aña qädär şuşı ike liberal'' partiä Däwlät Duması saylawlarında zur uñışsızlıqqa duçar buldı.

Yäkşämbe könne "Yabloko"nıñ citäkçese, prezidentlıq öçen köräştä inde ike märtäbä qatnaşqan Grigori Yavlinski, üz partiäseneñ bu yulı martta uzaçaq tawış birügä berkemne dä nämzät itep çığarmayaçağın xäbär itte. Ul monı kilep tuğan şartlarda Rusiädä ğadel saylawlar bula almawı belän añlattı. Anıñ fikerençä, Rusiädä xäzerge waqıtta küpmeder ähämiatkä iä bulğan ber genä bäysez mäğlümat çarası da qalmadı häm ildäge mäxkämä sistemasın da hiç tä başqarma xakimiattän bäysez dip atap bulmıy.

Audio, Grigori Yavlinski

Rusiädäge ikençe uñçı liberal'' partiä, SPS citäkçeläre dä, ğädättä Yavlinski belän härzaman bäxäsläşep toruğa qaramastan, bu yulı anıñ ildäge wäzğiatne bäyäläwe belän kileşä häm alar da, kiläse prezident saylawlarına üz nämzäten çığarudan baş tarta aluwı xaqında belderä. Äle genä uzğan Duma saylawlarında şuşı ike partiä, qanun taläp itkän 5%-lıq yaqlaw qazana almadı häm xäzer Dumada alarnıñ üz törkeme bulmayaçaq. Anıñ qarawı, xakimiat partiäse sanalğan "Yedinaya Rossiä" anda zur küpçelek qazandı häm demokratlar fikerençä, bu da, yäğni Dumanıñ ber partiäle genä parlamentqa äylänüwe şom salırlıq ber küreneş bulıp tora. Yänä Grigori Yavlinski:

Audio, Grigori Yavlinski

"Yabloko" citäkçese süzlärenä qarağanda, Rusiäneñ demokratik oyışmaları fäqät üzara berläşep, xäzerge xakimiatkä qarşı berdäm oppozitsiä tözegännän soñ ğına yäşäp qala ala. "Yabloko" belän SPS citäkçelege bu xaqta inde söyläşülär başlap qarağan ide, läkin älegä anda nindi dä bulsa uñışqa ireşü xaqında mäğlümat alınmadı. Mäskäwdäge Carnegie üzägendä eşläwçe Maria Lipman, "soñğı berniçä yıl däwamındağı häm bigräk tä Duma saylawları aldınnan tuğan wäzğiattän kürengänçä, berläşü tırışlıqları älegä näticägä kitermäde dip belderä.

Audio, Maria Lipman

Maria Lipman alay da, Rusiä demokratları arasında ber uñay täräqqiat bilgesen kürä. Alar xäzer prezident Putingä tiskäre qaraşta buluwın yäşermi, elek isä ildä bar närsä tänqitlänsä dä, Putingä tel tiderelmi ide di Rusiä demokratları arasında kilep tuğan wäzğiatne tikşerüçe Maria Lipman. Prezident saylawlarında qatnaşu mäs''äläsendä xätta kommunistlar arasında da fiker tarqawlığı xökem sörä. Ğädättä gel ikençe urında kilgän Gennadi Züganov bu yulı saylawlarda qatnaşmaw yulın saylıy ala. Ul oçraqta inde saylawlarnı ütkärü Putin öçen zur problemağa äylänäçäk.

Kärim Kamal, Praga
XS
SM
MD
LG