Accessibility links

Кайнар хәбәр

İjawda «Salawat» başqort oyışması mäktäptä qızıqlı oçraşu oyıştırdı


Udmurtiä respublikasın Başqortstannıñ Yanawıl rayonı belän Qama yılğası ayırıp tora. Älegä yılğa aşa küper tözelmägän. Ämmä duslıq küperläre ike respublika arasında inde küptän salındı. Udmurtiäneñ «Salawat» başqort oyışması äğzaları Yanawıl rayonı belän bik tığız elemtädä tora. Yanawllılar respublikada näşer itelgän «Yañarışnı» da üz ittelär. «Salawat» oyışmasınıñ ütkän comğada bulıp uzğan çirattağı çarası İjaw şähäreneñ 89—nçı yuridik—gumanitar litseenda yanawllılar belän oçraşu ide. Litsey uquçıları aldında Yanawıl rayonınıñ Qarman awıl urta mäktäbennän kilgän balalar bik matur çığış yasadı. Älege oçraşunıñ maqsatı Salawat Yulayıwnıñ 250—yıllığına äzerlänü çorında balalarnı başqort xalqınıñ qaharman ulı belän kübräk tanıştıru. Zalda utırğan balalarnıñ Salawat Yulaev turında berençe işetüläre dä açıqlandı.

audio

Şähär qısalarında üskän balalar tatar—başqort telendä yañğırağan här cırnı, şiğerlärne añlap betermäsä dä, konsertnı cılı qabul itte. Xor başqarğan cırlarnı tınıç qına tıñlap utırğan uquçılar, zamança käylärgä cırlarnı köçle alqışlarğa kümep qarşı aldı. Qarman awıl mäktäbe Yanawıl rayonında iñ zurlardan sanala. Anda, tatar tele uqıtuçısı Aygöl Älfir qızı Märdänova süzlärençä, balalarnıñ törle yaqlap säläten üsterü öçen barlıq mömkinleklär dä tudırılğan.

—audio—

Balalar da mäktäplären, uqıtuçıların xörmät itülären, bigräk tä cır uqıtuçıları Liliä Ğalimnär qızı Ovçinnikovanı yaratuların belderdälär.

—audio—

Liliä Ğalimnär qızı Ovçinnikova İjaw şähärendä muzıykal' belem alğan, balalarnı tatar—başqort kompozitorlarınnan tış, başqa xalıqlarnıñ muzıka sänğäte belän tanıştırırğa omtıluın belderde. Şul isäptän, udmurt kompozitorları äsärlärenä zur urın birüen äytte. Xäzerge konsertta da berniçä udmurt kompozitorınıñ xor öçen yazılğan äsärläre yañğıradı. Şul uq waqıtta Liliä xanım üze dä icat itä ikän. Salawat Yulayıwnıñ yubileenä bağışlap uzdırılğan konkursta qatnaşu maqsatınnan xor öçen maxsus cır yazuın citkerde. Näq şuşı cır belän küptän tügel Ufada uzğan bäygedä alar berençe urınğa layık bulğannar.

—audio—

«Salawat» oyışması äğzaları kiläçäktä bu elemtälärne nığıtu niäte belän İjaw şähäreneñ 86—nçı litsee häm Yanawıl rayonı Qarman awıl mäktäbe belän kileşü tözü turında da süz alıp bardılar. Monıñ maqsatın «Salawat» oyışmasınıñ iñ aktiv äğzası Gölnur Asadullina bolay bilgeläde.

—audio—

Östäp şunı da äytergä kiräk, 86—nçı litseyda «Salawat» oyışması berniçä yıl elek başqort telen öyränergä teläge bulğan balalar öçen yakşämbe mäktäbe dä açqan ide. Tatar—başqort telendä söyläşkän balalar belän aralaşu telne üzläşterüdä dä yärdäm itär digän ömettä oyışma wäkilläre.

Xämidä Ğayfullina, Udmurtiä

XS
SM
MD
LG