Respublika xakimiätlärenä oppozitsiädä toruçı oyışmalardan torğan «tüğäräk östäl» atna sayın diärlek cielışlar ütkärep tora. Anda Federal demokratlar, uñ köçlär, milli xäräkät wäkilläre häm sulçılar da kerä. Oppozitsiädä toruçı şuşı oyışmalar Tatarstan Däwlät Şurası saylawlarında niçek berdäm köç itep çığarğa dip uylana xäzer. Söyläşülär äle haman da bara. Läkin, tögäl itep şunı äytep bula: Kommunistlar firqäse häm LDPR yäğni Jirinovskiy firqäseneñ Tatarstan büleklege saylawlarğa möstäqil räweştä bara, yäğni başqa säyäsi oyışmalar belän bloklarğa kermi. Duma saylawlarında 5% kirtäne ütä almağan başqa küp sanlı säyäsi oyışmalar, kiresençä, berläşep, saylawlarda bloklar tözep, annarı säyäsi berlek räweşendä saylawçılar aldında çığış yasarğa teli. Bu xaqta bezgä, kommunistlar firqäseneñ Tatarstan bülege wäkile Robert Sadıyqov xäbär itte. Aldan iğlan itelgänçä, berläşügä «tügäräk östäl»neñ federal-demokratlar, sulçılar häm milli xäräkät wäkillärennän torğan qanatları barırğa mömkin.
Oppozitsion törkemgä kergän milli xäräkät wäkilläre Fäüziä Bäyrämova, Zöhrä Äysinä, Ğabdulla xäzrät Wälulla da säyäsi fikerdäşlär ezli. Ä Räşit Yäğfärov citäkçelegendäge Böten tatar ictimaği üzäge milli xäräkättä torsa da, «tügäräk östäl» oyışmasına kermi. Andağı kollegaları belän çağıştırğanda İctimaği üzäk, saylawlarğa kem belän barasın xäl itkän inde. Ul Rif Zarifullin citäkçelegendäge, sul qaraşlı, «Xezmät firqäse». Milli xäräkätneñ şuşı ike tarmaq wäkillärenä ber berse belän ber okrugta köräşergä turı kilü-kilmäwe turında älegä äytep bulmıy.
«Tügäräk östäl» berläşmäsendä, ber yañalıq ta bar. Oppozitsion oyışmalarğa «Tormış firqäse» dä kilep quşılğan. Räfqät Altınbayev tarafdarları da «tügäräk östäl» däge säyäsätçelär belän urtaq tel tabırğa teli.
«Berdäm Rusiä» firqäseneñ Tatarstan bülege citäkçese Färit Möxämmätşin, qayber firqälär belän nämzätlärne kileşterü mömkinlege xaqında beldergän ide. Kommunistlar firqäse wäkile Robert Sadıyqovnıñ äytüenä qarağanda, tügäräk östälgä xakimiätlärdän andıy täqdimnär yasawçılar bulmadı.
Ä xakimiät firqäse, üzeneñ saylawlarğa mönäsäbäten 10nçe ğinwarda iğlan itäçäk. Bu xaqta, 20nçe dekaberdä « Berdäm Rusiä» töbäk bülegeneñ Säyäsi şura utırışında qarar qabul itelgän. Nämzätlär isemlege dä, ğinwarda bulası konferensiäsendä iğlan iteler dip kötelä.
Xakimiät firqäse, nindi isemnärne atar, kemnäre deputat itep kürergä telär, älegä äytep bulmıy. Xäzergä, şunsı bilgele. Deputat Tufan Miñnullinnıñ, elekke Duma deputatı İvan Graçevnıñ häm kommunist Aleksandr Saliynıñ Tatarstan Däwlät Şurası saylawlarında qatnaşırğa teläge bar.
Bikä Timerova
.
