Şulay itep çärşämbe kiçendä Tatarstanğa täbiğat qazası kilde. Köne buyı cepşek qar yawğannan soñ, ber niçä säğät eçendä temperatura plyus ikedän minus altığa citte. Yullarda avtomobillär tığıldı, elektr liniälärendä avariälär kitte. Aeroport, avtovokzal telefonnarı gel mäşğül-beleşüçelär küp. Ukrainadan Tatarstan wäkillären alıp qaytırğa tieşle oçqıç biş-altı säğätkä soñarıp tönge öçtä genä qaytıp töşte. Şöker bu totqarlanu xäwef-xätär belän bäyle tügel ikän. “Ukrtatnaft” aksionerlıq cämğiäteneñ yıllıq cıyılışına barğan delegatsiä eş barmaw säbäple totqarlanğan. Tatarstan belän Ukrainanıñ “Ukrtatnaft” berläşmäse tiräsendä yaqlar konfliktı inde küptän bara. “Ukrtatnaft”nıñ küzätüçe şurası räise respublikanıñ berençe vitse-premyerı Rawil Moratov yıl başında uq açıq itep “bez “Ukrtatnaft”ta Tatarstan öleşen arttıraçaqbız, xälitkeç öleşkä qädär citkeräbez”, dip beldertkän ide. Läkin Ukraina yağı inde berniçä märtäbä aksiälär yazmışın xäl itä torğan cıyılışlarnı özä. Bu cıyılışta Tatarstan yağı aksiälärgä östämä emissiä yasaw täqdime belän barğan. Häm bu täqdimne ütkärergä mömkinlek bulğan. Läkin Ukraina yağı formal' säbäp tabıp cıyılışqa kilmägän. Räsmi mäğlümat çaraları “Ukrtatnaft”nıñ yıllıq aksionerlar cıyılışı özelde, dip xäbär ittelär. Läkin ğayıre räsmi çığanaqlardan belengänçä, Tatarstan monnan da otış alğan. Küzätü şurasında Tatarstan yaqlı Ukrainanıñ öç wäkile saqlanıp qalğan. Şulay itep “Ukrtatnaft” berläşmäsendä äle Tatarstan süze ütäçäk.
Räsmi mäğlümat çaraları Rawil Moratov Kremençukta “Ukrtatnaft” şirkäteneñ benzin öläşü yaña stansiäsen açuda qatnaştı, dip xäbär ittelär. Şulay uq räsmi xäbärlärdä Tübän Qamada Rusiädä berdän-ber sintetik maylar citeşterü zavodı açıldı, dip tä äytelä. Älege zavod tözü turında qarar monnan dürt yıl elek kenä qabul itelgän ide häm ul öç yılda salınıp ta bette. Zavod tözeleşenä iñ küp öleş - 37 million dollarnı “Tatneft'” berläşmäse kertkän. Zavodta älege ölkädä alğa kitkän illärdäge texnologiälär häm cihazlar qullanılğan.
İqtisadi yañalıqlardan iğtibarnı cälep itkäne Mäskäwdän kilde. Räsmi xäbärdä – Rusiä xökümäte finans lizing kompaniäse açıq aksionerlıq cämğiäteneñ ustav kapitalın arttıru turında qarar qabul itte, dielä. Älege cämğiät monnan altı yıl elek oyışqan bulğan. Rusiä xökümätendä aksiälärneñ kontrol' paketı (58%) başqa aksionerlar - Tatarstan xökümäte häm “Tatneft'” berläşmäseneñ bülekçäläre. Finans lizing kompaniäse Qazan aviatözeleş berläşmäseneñ Tu-214 oçqıçların tözü häm lizing buyınça satu däwlät programmasın ütäw öçen tözelgän.Yunıs Ätnäle.
