Comğa äle 26 dekaber ğına buluğa da qaramastan, Qazanda inde Yaña yılnı bäyräm itä dä başladılar. 26 dekaberdä, Basket-xollda balalar öçen respublikanıñ töp çırşı bäyräme uzdı. Anda böten Tatarstannan cıyılğan talantlı, sälätle balalar, uqu aldınğıları, balalar yortlarında tärbiälänüçe – barısı 5 meñ bala qatnaştı. Bäyrämne Mäğärif häm Yäşlär eşläre ministrlıqları häm Qazannıñ mäğärif idäräse oyıştırdılar. Balalarnı Yaña yıl belän qotlarğa 300dän artıq artist kilde. Alar arasında respublikanıñ tanılğan sänğät ostaları ğına tügel, Rusiä estradası wäkilläre dä buldı. Şulay uq, yaña yıl teläklären alarğa Tatarstan prezidentı Mintimer Şäymiev tä citkerde. Östäwenä, älege çarağa kilgän balalarğa bäyräm büläge dä tapşırıldı. Şähärneñ teatrlarında da comğadan balalar öçen Yaña yıl tamaşaları başlanıp kitte.
Gölnaz İlgizär
Comğa Tatarstan xäbärläre tuplanmasınıñ axırında – mädäniät yañalıqları. 26 dekaber könne Tatarstannıñ häm Rusiäneñ xalıq artistkası İslamiä Mäxmütova üzeneñ 60 yäşlek yubileyın bilgeläde. 40 yıl ğömeren teatrğa bağışlağan İslamiä xanım bügen dä äle säxnädä uynawın däwam itä. Alay ğına da tügel, üzeneñ balalarınıñ da şuşı yuldan kitüenä näq menä ul säbäpçe bulğan. Şunısın da äytergä kiräk, İslamiä Mäxmutova tanılğan aktrissa buluı belän genä bilgele tügel, ul äle pyesalar yazu häm tärcemä itü belän dä şöğellänä. Anıñ Sin bit minem bergenäm melodraması, äle haman da teatr säxnäsendä uynala. 24 dekaber kiçendä Kärim Tinçurin teatrında İslamiä Mäxmutovanıñ yubileyı uñayınnan anıñ icat kiçäse uzdı. Anda artistka uynağan törle spektakl’lärdän özeklär kürsätelde, İslamiä xanım 60 yäşlege uñayınnan dusları häm xezmättäşläre tarafınnan qotlawlar aldı. Küptän tügel genä bilgele bulğança, Bertol’d Brextnıñ Kuraj ana häm anıñ balaları spektaklendä Kuraj ana role öçen artistkağa Damir Siraciev isemendäge teatral’ premiä dä tapşırıldı. Cıyın waqıfı tarafınnan här yılnı tapşırıla torğan bu premiägä şulay uq Tübän Kama tatar drama teatrı rejisserı Röstäm Ğäliev, Tatar Yäş tamaşaçılar teatrı direktorı Rifqät Yaqupov häm cäy köne wafat bulğan aktrissa Firdäwes Xäyrullina layıq dip tabıldı.
