Baku. Azärbaycannıñ appelätsiä mäxkämäse elekke saqlanu ministrı Räğıym Ğazievne törmädä totu mötdäten qısqarttı. Berniçä yıl elek ul ğömerlek törmä cäzasına xökem itelgän ide, xäzer isä mäxkämä şul mötdätne 15 yılğa ğına qaldırdı. Şuşı qısqartunı isäpkä alıp Ğazievkä törmädä tağın 8 yıl qalaçaq. İlneñ saqlanu ministrı bulıp eşlägän Räğıym Ğaziev 1995-nçe yılda Tawlı Qarabaxnıñ qayber öleşlären ärmän ğäskärlärenä birüwe, däwlät mölkäten äräm-şäräm itüwe häm üzendä däwlät qulındağı qorallarnı saqlawı öçen ülem cäzasına xökem itelde. Xökem qararı annan başqa ğına çığarıldı, çönki ul äle 1994-nçe yılda uq Rusiägä qaçqan ide. 1996-nçe yılda Rusiä xakimiate anı kire Bakuğa tapşırdı, ä inde tağın ike yıldan soñ Azärbaycannıñ ülem cäzasın beterüwe säbäple Räğıym Ğaziev cäzası ğömerlek törmägä almaştırıldı. Anıñ iseme bügenge köndä Yevropa Şurasınıñ säyäsi totqınnar isemlegenä kerä.
