İran parlamentınıñ reformaçıl äğzaları 5 kön elek başlanğan protest çarasın däwam itep parlamenttan çıqmıy utıra häm anda üz taläpläre ütälgänçegä qädär utıraçaqların belderä.
Alar qädimçe Saqçılar Şurasınıñ 3 meñnän artıq namzätne, şul isäptän xäzerge parlamenttağı küp kenä deputatlarnı kiläse ayda ütäçäk parlament saylawlarınnan çitläşterüçe qararın ğämäldän çığarunı taläp itä.
Alarnıñ belderüendä bu protest çarası saylawlarnı irekle, ğädel häm xoquqıy itep ütkärü maqsatınnan uzdırıla dielä.
Kiçä İrannıñ yuğarı ruxi citäkçese Ayatulla Ali Xamenei beräwneñ dä xoquqın bozmaw maqsatında Saqçılar Şurası qararın yañadan küzdän kiçerergä çaqırdı.
İldäge töp reformaçıl partiä başlığı häm İran Prezidentınıñ bertuğanı Möxämmät Riza Xatami protest belderüçe deputatlar Saqçılar Şurasınıñ saylawlardan citläşterelgän namzätlär mäs'äläsen yañadan küzdän kiçerüen kötäçäk dide.
