Accessibility links

Кайнар хәбәр

SPİD belän narkomaniä zur afätkä äylänä


Başqortstan respublikında VİÇ infeksiäneñ taraluın kisätü mäsäläläre buyınça vedomstvoara komissiäneñ çirattağı utırışı bulıp ütte. Älege citdi söyläşüne Başqortstan vitse – premyerı Fidus Yamaltdinov alıp bardı. Utırışnıñ kön tärtibenä 5 mäsälä kertelgän ide. Şul isäptän Başqortstanda VİÇ infeksiäse belän awıruçılar däräcäsen tikşerü häm respublikta narkotiklarnıñ qanunsız äyläneşe belän köräşneñ torışı mäsäläläre dä buldı. Berniçä cawaplı oyışma citäkçeläre häm wäkilläre üzläre atqarğan eşlär xaqında xisap tottı häm kiläçäkkä qayber täqdim – kiñäşläre belän urtaqlaştı. VİÇ infeksiäse taralu cähätennän Başqortstan xäzer iñ xäwefle töbäklärneñ bersenä äylänep bara, dip bilgeläde küpçelek çığış yasawçılar. Älege köndä respublik buyınça cämğıse 5 meñgä yaqın keşe SPİD çiren yoqtırğannar isemlegendä terkälgän. Ämma bu san tulı mäğlümatnı birmi. Çönki utırışta söyläwçelär äytüençä, äle räsmi terkälmägän çirlelär sanı da şaqtıy buluı ixtimal. VİÇ infeksiäse küp oçraqta, atap äytkändä, 70 protsenttan artıq oçraqta narkomaniä yätmäsenä elägüçelär arasında tarala ikän. Alar äfyünne enä belän kertkändä älege zäxmätne yoqtıra. Respublikta xäzer SPİD belän çirläwçe analardan tuğan balalar sanı da arta. Andıy sabıylar ayırım tikşerü astına alına. SPİDnı däwalaw häm kisätü buyınça Üzäkneñ baş tabibı urınbasarı Sergey Zaysev süzlärençä, aldağı yıllarda VİÇ infeksiäse yörtüçelär sanı tağın da artaçaq. Çönki äle bu protsess nıqlap başlanıp qına tora, ä anı kisätü çaraları näticäle tügel. Utırışta çığış yasağan Däwlät narkokontrol idaräse citäkçese urınbasarı Vitaliy Martınov ta bik xäwefle sannar kiterde. Uzğan 2003 yılda Başqortstanda röxsätsez narkotiklar äyläneşe ölkäse belän bäyle cinayätlär 4255 oçraqqa citkän. Şularnıñ yartısınnan kübräge awır cinayätlär ikän. Martınov äfände süzlärençä, soñğı biş yılda Başqortstanda meditsinağa qağılışı bulmağan xäldä narqotik häm psixotrop matdälär qullanu ike yarım tapqırğa qädär artqan. Narkomaniä bigräk tä yäşlär arasında kiñ tarala. Äfyünnär qullanuçılarnıñ häm äfyünnär belän mawığuçı cinayätçelärneñ 70%nan artığı 30 yäşkä qädärge yäşlär. Vitaliy Martınov aldağı yıllarğa narkotiklar belän bäyle cinayätlärneñ tağın da artaçağın farazladı. Anıñ fikerençä, bar Rusiä buyınça bu afät kiñ taralğanda Başqortstan ğına çittä ber imin utraw bulıp qala almıy. Citmäsä, Başqortstan yullar çatında da tora äle. Şuña äfyünnärneñ baytaq öleşe respublik aşa uza häm ber öleşe şuşında üz qullanuçıların da taba. Utırışta zaman tudırğan bälalärgä qarşı köräş çaralarınıñ bıyılğa qayber plannarı tikşerelde häm qabul itelde. Qäğäzdä genä qalmasalar yarıy da inde ul plannar.
XS
SM
MD
LG