Mäskäw. İkeyaqlı xärbi xezmättäşlek mäs'älälären tikşerü öçen Rusiäneñ saqlanu ministrı Sergey İvanov düşämbedä ike könlek säfär belän Hindstanğa baraçaq. Hind başqalası Dähligä ul düşämbedä kiler dip kötelä, anda anıñ Hindstan saqlanu ministrı George Fernandes belän söyläşülär ütkärüe qaralğan. Mäskäwdä Rusiä saqlanu ministrlığı bäyän itkän belderüdä, yaqlar ike il arasındağı xärbi häm texnik bäyläneşlärne tağın da nığıtu yulların qarayaçaq dip äytelä. Hindstan çittän satıp alğan qoral häm xärbi cihazlarnıñ 70 protsentı Rusiägä turı kilä, gärçä soñğı yıllarda räsmi Dähli qoral satıp alu ölkäsendä torğan sayın nığraq Yevropa illärenä, İzrail häm Quşma Ştatlarğa da qarıy başladı. Bügen Hindstan xökümäte Rusiädän "Admiral Gorşkov" oçqıç korabın alu mäs'äläsen tikşerde. Bu xaqtağı söyläşülär ike il arasında inde berniçä yıl alıp barıla. Sergey İvanov säfäre barışında bu iñ möhim mäs'älälärneñ berse bulaçaq.
