İran prezidentı Möxämmät Xattami citäklägän firqä, saylawlardan çitlätelgän reforma-taraflı namzätlär mäsäläsendä çaralar kürelmäsä, saylawlarğa baykot belderü belän kisätte. Firqäneñ kiçäge utırışında qabul itelgän belderüdä äytelgänçä, ägär bu wazğiättä aşığıç çaralar kürelmäsä, saylawlarda qatnaşunıñ mägnäse qalmıy. Prezidenttan tış, utırışta, şulay uq firqä äğzası bulğan, Mäcles räise Mähdi Qarubi da qatnaştı. Qadimçelär qulında bulğan Saqçılar Şurası 3 meñnän artıq reforma-taraflı namzätne saylaw isemlegennän sızıp taşlağannan soñ İranda säyäsi cancal barlıqqa kilde. Parlament saylawları 20 fivralgä bilgelängän.
