Watanım Tatarstan gäcitendä köndälek räsmi xäbärlärdän ğäyre, başqa qızıqlı materiallar da bar. Mäsälän, Räis Zaripovnıñ Tatar generalı nilär kürmi digän yazması iğtibarğa layıq. Anda jurnalist Böyek Watan suğışı qaharmanı Petr Gavrilovnıñ yazmışın taswirlıy. Şulay uq gäcitneñ 23nçe ğinwar sanında Rusiäneñ berençe prezidentı Boris Yel’tsinnıñ keçe qızınıñ berençe ire Vilen Xäyrullin turında da külämle yazma urnaştırılğan. Gäcitneñ Şiğriät rubrikasında uquçılar Saniä Äxmätcanovanıñ icatı belän tanışa ala. Ä Can awazı rubrikasınıñ Aptırağan ürdäk isemle yazmasında Qazanda eşläwçe ber tatar tele uqıtuçısınıñ moñ-zarları urın alğan. Mädäni comğa gäcite üzeneñ çirattağı sanında uquçılarnı Törkiädä eşläp kilüçe Äxmätwäli Mäñgär waqıfı tarafınnan bastırılğan kitaplar belän tanıştıra. Şulay uq monda Tatarstan kitap näşriätendä dönya kürgän kitaplar xaqında da belep bula. Kiläçäk saylawlar xaqında mäğlümät alırğa teläwçelärgä isä respublikanıñ Üzäk saylaw komissiäse räise Anatoliy Fomin belän äñgämä qızıqlı bulır. Asılıbızğa qaytıp barışlıy rubrikasında Tatarstannıñ häm Rusiäneñ xalıq artistı Äzhär Şakirov belän äñgämä urın alğan. Anda tanılğan artist üzeneñ tormışındağı zur waqiğa – Xacğa baruı turında istäleklär belän urtaqlaşa. Mädäni comğa tağın ber säxnä ostası – tatar teatrında inde 1952nçe yıldan birle uynawçı Vera Minkina xaqında da yazma bastırğan. Şulay uq Qasıym Xämzinnıñ Taqtaş häm anıñ ğailäse digän mäqälä dä uquçılarğa şaqtıy qızıqlı bulır. Mädäni comğa üzeneñ 3nçe sanında tatar tele yazmışına da bitaraf qalmağan. Gäcitneñ ike bite Respublika Mäğärif oyışmalarında tatar telen öyränüneñ torışı xaqında respublika Däwlät Şurasınıñ komissiä utırışında bulğan söyläşügä bağışlanğan. Bu temanı Milli mäğärif çigenmi, alğa baraçaq isem astındağı yazmada Mäğrifät gäcite dä çitlätep uzmağan. Anda şulay uq älege problema xaqında Tatarstannıñ Mäğärif ministrı Faris Xarisov fikerläre dä urın alğan. Annan tış Näsim Aqmal uquçılarnı Baltaç rayonınıñ Alan urta mäktäbe belän tanıştıra. Ä Raşat Nizami üzeneñ saylaw aldı uylanuların täqdim itä.
Gölnaz İlgizär
