Accessibility links

Кайнар хәбәр

Udmurtiä tatar ictimaği üzäge Şurasınıñ çirattağı cıyını bulıp uzdı


Udmurtiä tatar ictimaği üzägeneñ eş planında qaralğança, 24nçe ğinwarda çirattağı plenumı bulıp uzdı. Anıñ eşendä respublikanıñ tatarlar kümäk yäşägän rayonnarında oyışqan üzäkneñ filiallarınnan da äğzalar qatnaştı. Kön tärtibendä üzäkneñ 2003nçe yılda başqarılğan eşlärenä yomğaq yasaw, ağımdağı yılğa eş planın raslaw, başqa mäs'älälär quyılğan ide.

Tatar ictimaği üzägeneñ citäkçese Fnün Ğawas ulı Mirzayanov 2003nçe yılda başqarılğan eşlär turında täfsille mäğlümat citkerde, ä qaysıber ölkädäge eşlärgä analiz yasadı.

Udmurtiä tatar ictimaği üzäge 3-Bötendönya tatar kongressı qabul itkän qararlarnı tormışqa aşırunı üzeneñ eşeneñ töp yünäleşe itep alğan. Şulay uq ütkän yılnıñ yazında Udmurtiä häm Tatarstan respublikaları arasında yañartılğan duslıq häm xezmättäşlek kileşüendä qaralğan ike respublikanıñ iqtisat ölkäsendäge bağlanışlarnı da, Bötendönya tatar kongressınıñ başqarma komitetı qabul itkän biznes buyınça qararlarnı da çitlätep ütmägän. Bu yaqtan ütkän eş yılında ayırım zur uñışlar bulmasa da, kiläçäktä TİÜneñ finans mömkinleklär artır digän fikerne citkerde.

Fnün Mirzayanov komissiälär eşenä tuqtalıp, mäğärif ölkäsendä soñğı yıllarda sülpänlek sizelä dip bilgeläp ütte. Tatar tele uqıtuçıları, mäktäp direktorları bergäläp häm ata—analar belän dä yaxşı mönäsäbättä bulğan mäktäplärdä tatar sıynıfları cıyıla. Administratsiä wäkilläreneñ dä moña qaraşı uñay.

Audio

Dimäk şuşı uq ictimaği xäräkät wäkilläreneñ agitatsiä eşen oyıştıra almawdan tora. Tatar üzäge citäkçese Fnün Mirzayanovtan soñ çığış yasawçılar — Mojgadan Qamil Kubaşev, Kambarkadan Mirdälif Yakupov, Sarapuldan Näcip Qamal, häm başqalar, mäktäplärdä berençe sıynıfqa balalar tuplaw başlansa da, bu temağa açıqlıq kertep, ber süz dä äytä almadı. Küp çığışlarda haman ber süz — ölkännärne ramazan ayında iftar aşlarına cıyğannar, 9nçı mayda suğışta häläk bulğan soldatlar häykälenä çäçäk bäyläme salğannar, yäisä Mäñgelek ut yanında uzğan tantanada qatnaşqannar, mäçet tözeleşe öçen cir alğannar, cır festivalläre uzdırğannar häm başqalar. Süz dä yuq, bolar da kiräk eş, ämma yäş buınnı milli ruxta tärbiäläw, tuğan teldä uqıtu niçekter çitkäräk etelä tatar üzäge wäkilläre tarafınnan. Alda Fnün Mirzayanovnıñ äytüençä, tatar sıynıfın açuda, nänilärne tatar törkemenä cıyuda administratsiälär tarafınnan qarşılıq kürsätüçe yuq, ämma anı oyıştıruçı da yuq. Bu temağa milli säyäsät ministrlığınnan belgeç Fändüs Xucin çığışın ğına misal itep kiterep bula. ijawdağı tatar gimnaziäseneñ uqıtu öçen mäydanı tar, klasslar sanın arttıru mömkinlege yuq, şuña da «Respublika üseşe» dip atalğan, — anı prezident programması dip tä yörtälär, — şuşı planğa gimnaziägä yanqorma tözü mäs’äläsen kertüne sorap xat yazarğa täqdim itte Fändüs Xucin.

Tatar ictimaği üzägeneñ xörmätle prezidentı Mäsğüt Garatuyıv saylawlar yaqınlaşuın häm tağın milli qartanı uynataçaqlar, citäkçelär, säyäsätçelär qarşında «tälinkä totıp» tormasqa, aldağı saylawlarda wäğdä itkän plannarın ütäwläre—ütämäwläre turında xisap totarğa sorarğa, üzebezneñ konkret teläklärne citkerergä täqdim itte.

«Yañarış» gazetası möxärrire İrek Şäripov fevral'dän respublikanıñ yaña kanalında oyıştırılaçaq tatar tapşıruları turında mäğlümat citkerde, cirle tatar üzäkläre citäkçelären yaña mäğlümat çaralarında aktiv qatnaşırğa çaqırdı.

Plenum Udmurtiä tatar ictimaği üzägeneñ çirattağı, altınçı, qorıltayın uzdıru waqıtın bilgeläde. Qorıltay 20 martta uzaçaq, üzäkneñ Ustavına, häm strukturasına üzgärtmälär kertü turında fiker alışınıldı. Qorıltayda qatnaşu öçen cirle tatar ictimaği oyışmalarında cıyınnar uzdırıp, delegatlar saylaw buyınça täqdimnär yañğıradı.

2004nçe yılğa eş planı raslandı.

Xämidä Ğayfullina, «Azatlıq» radiosı, Udmurtiä.

XS
SM
MD
LG