Accessibility links

«Ällüki» jurnalı täwge bäyrämen ütkärde


30 ğinwar könne Başqortstan tatarlarınıñ mädäniätenä, matbuğatına qağılışlı istälekle waqiğa buldı. Respublikada tatar balaları öçen yaña ğına çığa başlağan «Ällüki» jurnalın cämäğätçelekkä täqdim itü çarası ütte. Elegräk tä xäbär itelüençä, Başqortstanda bu yıl başınnan tatar balaları öçen «Ällüki» isemle bik matur jurnal çığa başladı. Anıñ täwge sınaw basması uzğan yıl azağında 50 meñ tiraj belän näşer itelgän dä ide inde. Bu atnada isä anıñ bıyılğı berençe sanı da dönya kürde. Bu yılğa «Ällüki» jurnalı bötenrusiä yazılu katalogına kertelde häm aña täwge yartiıllıqqa 3 meñnän kübräk abunäçe yazılğan. Tatar telendäge balalar jurnalın Başqortstanda küptän zarığıp köttelär. Şuña da anıñ tirajı kiläçäktä tağın da zurraq bulır digän ışanıç bar. Älegä anıñ çığa başlawı xaqında mäğlümat, reklam ğına citenkerämäde, şikelle.

Tatar telendäge «Qızıl tañ» gäzite yanında eşläyäçäk «Ällüki» jurnalı 30 ğinwarda Ufada üzeneñ täwge bäyrämen – uquçılar belän oçraşuın ütkärde. Başqalanıñ «Belem» dip atalğan kitap kibetendä «Ağidel» näşriät yortı oyıştırğan bu tantanağa küp kenä keşe kilgän ide. Arada şağirlär häm cırçılarıbız da buldı. Bäyrämgä şulay uq Ufadağı 194 nçe urta mäktäptän tatar balaları da çaqırılğan. Bäyrämne «Qızıl tañ» gäziteneñ häm «Ällüki» jurnalınıñ baş möxärrire Fail Fätxetdinov açtı häm respublikada balalar öçen jurnal çığa başlawnı zur waqiğa dip atadı.

Räsmi çığışlardan soñ, yaña jurnalnı qotlap balalar çatnatıp şiğerlär söyläde häm cırlar cırladı. Alardan soñ çığış yasağan tanılğan cırçı Radik Dinäxmätov cırların da ixlas tıñladı bu bäyrämgä kilüçelär. Soñınnan bu tantanada qatnaşqan mäktäp uquçılarına häm balaları belän kilgän millättäşlärebezgä «Ällüki»neñ täwge sınaw sanı belän «Qızıl tañ» gäzite bu yılğa näşer itkän kalendar' büläk itelde. Şulay itep Başqortstannıñ tatar balaları da üz basmasına iä buldı. Yaña jurnalnıñ möxärrire urınbasarı Läysän Yaqupowa jurnalnıñ kiläçäge ömetle bulaçağına ışana.

(yazma)

«Jurnalıbız bik matur, tösle itep çığarıla, – di Läysän xanım. – Bez başqa jurnallarda bulmağan yaña rubriklar da açtıq. Sälätle balalar turında da küp yazarğa niätlibez. Ğomumän, kiläçäktä tirajıbız gel üsügä barır dip ışanabız bez».
XS
SM
MD
LG