Accessibility links

Кайнар хәбәр

Däwlät sekretare Powell bıltırğı çığışındağı dälillärneñ şikle buluı xaqında belderä


Saddam çorındağı Ğiraqta küpläp yuq itü qoralları bulu-bulmawı turındağı mäğlümatneñ döreslegen tikşerü öçen Amerika Quşma Ştatlarında da bäysez komissiä tözergä buldılar, xörmätle tıñlawçılar. Bu xaqta prezident Bush üze iğlan itte. Ul arada anıñ iñ yaqın kiñäşçelärennän berse, däwlät sekretare Colin Powell, ägär dä min Ğiraqta andıy şikle qorallar yuqlığın aldan uq belgän bulsam, Ğiraqqa qarşı xärbi köç qullanunı bälki yaqlamağan da bulır idem dip belderde.

Şuşı süzlären Quşma Ştatlarnıñ däwlät sekretare bügen "Washington Post" basmasında dönya kürgän äñgämäsendä äytä. Anda ul, "Ğiraqta tıyılğan qorallarnıñ bulmawı bar säyäsi xisaplarnı boza, Quşma Ştatlar uzğan yılda suğışnı, Saddamda andıy qorallarnıñ buluına berşiksez ışanıp başladı" dip belderä. Ä näq ber yıl elek Powell New Yorkta, Berläşkän Millätlärneñ İminlek Şurasında, Amerikanıñ Saddamğa qarşı köç qullanu xoquqın yaqlaw maqsatında äwzem diplomatik höcüm alıp bara ide. Ul çaqta amerikan däwlät sekretare Şuradağı qalğan 14 ilneñ tışqı eşlär ministrına, Saddam Xösäyendä biologik qorallar buluına şik yuq dip belderde.

Audio, Colin Powell

"Saddam Xösäyenneñ biologik qorallarğa iä buluına häm alarnı äle tağın da kübräk külämdä citeşterä aluına bernindi dä şik bula almıy. Ul şul ülem kitererlek ağularnı häm çirlärne, keşelärne küpläp ütererlek itep tarata da ala" dip söylägän ide İminlek Şurasınıñ bıltırğı mäğlüm utırışında Quşma Ştatlarnıñ däwlät sekretare Colin Powell. Üz çığışında ul qorı ğäyepläwlär belän genä çiklänmäde, xätta sannar da kiterde, misal öçen, Saddam berqayçan da üzendä bulğan 550 gärçiç gazlı tup yädräseneñ qayda ikänlege turında xisap totmadı dip belderde. Häm iñ möhime, Powell ul çaqta, bu ğäyepläwlär ber dä faraz mazar tügel, ä faktlar digän ide.

Audio, Colin Powell

"Min bügen bäyän itkän här mäğlümat çığanaqqa, ışanıçlı çığanaqqa tayana, bolar bernindi dä faraz tügel. Bez sezgä citkergän närsä fäqät ışanıçlı küzläw mäğlümatına nigezlängän faktlar bulıp tora" dip belderä Powell. Ul şuşı süzlären ber yıl elek äytkän ide. Läkin İminlek Şurası axırğı çiktä Ğiraqqa qarşı suğış başlaw öçen fatixanı barıber birmäde, Quşma Ştatlar moña Britaniä häm tağın berniçä il belän üze genä alındı. Däwlät departamentında eşlägän ber räsmi wäkil, Greg Thielmann soñraq, Powellnıñ İminlek Şurasındağı şuşı çığışın, "anıñ, yäğni däwlät sekretareneñ amerikan xalqına şanlı xezmät itü yulındağı iñ tübän noqtalarınnan berse" dip bäyälägän ide. Xäzer isä Colin Powell "Washington Post" basmasına, "minem İminlek Şurasındağı çığış Quşma Ştatlarnıñ töp küzläw oyışması CİA birgän mäğlümatlarğa tayanğan häm anıñ tarafınnan yaqlanğan ide" dip belderä. Ul äytkännärgä qarağanda, çığışta CİA tarfınnan raslanmağan ber genä süz dä bulmağan. Mäğlüm ki, Ğiraqta şikle qorallar bulu ğäyepläwlären Waşington ilgä bärep kerep Saddam Xösäyenne xakimiattän töşerü öçen qullandı. Xäzer inde prezident Bush üze dä ul ğäyepläwlärneñ nigezle bulu-bulmawı turındağı bäxäskä üz mönäsäbäten belderergä mäcbür, düşämbedä ul, amerikan küzläw oyışmalarınıñ Ğiraq mäs''äläsendä nindi mäğlümat birüen tikşerü öçen bäysez komissiä tözeläçägen iğlan itte. Anıñ süzlärençä, ul Ğiraq turındağı faktlarnı belergä teli.

Kärim Kamal, Praga
XS
SM
MD
LG