Federal' İminlek xezmäte häm eçke eşlär ministrlığı bu şartlawnı terror höcüme dip bäyäläde häm bombanı intixarçı şarltatqan bulırğa mömkin dide.
Şartlaw bulğan metro tunnelendä xäzer tikşerü eşläre bara. Belgeçlär başqa urında şartlatu öçen äzerlängän bombanıñ waqıtınnan alda metroda şartlağan bulu mömkinlegen öyränä.
Rusiä eçke eşläre ministrı urınbasarı Aleksandr Çekalin Mäskäwdä östämä iminlek çaraları kürelä dide.
Şartlawdan soñ başlanğan yanğın sünderelep şul tirädäge 700-läp keşe evakuatsiälängän.
Şarltawdan soñ Rusiä prezidentı Vladimir Putin çığış yasap däwlätlär terrorğa qarşı suğışu öçen üz köçlären berläşterergä tieş dip äytte.
Putin Rusiä terrorçılar belän söyläşülärgä barmıyaçaq dide.
Şartlaw urının tikşerülçelär äle Çeçnä belän bäyläneşne raslawçı dälillär tapmasa da, Putin bu şartlaw Çeçen citäkçese Aslan Masxadovnıñ bäysezlek xäräkätenä barıp totaşa dip isäpläwe turında belderde.
Masxadov wäkile Äxmät Zakayev Azatlıq radisoına ğisyançı çeçen citäkçelege bu şartlawnı häm terror höcümnären ğäyepli dide.
Televidenie aşa kürsätelgän çığışında Putin bu şartlaw kiläse ayda ütäçäk prezident saylawlarına bäyle bulırğa mömkin dip äytte. Anıñ fikerençä bu höcüm Rusiä xökümätenä basım yasaw öçen oyıştırılğan bulırğa mömkin.
AQŞ prezidentı George Bush Putinğa telefon şaltıratıp qızğanıç belderde. Yewropa illäre citäkçeläre dä bu şartlawnı ğäyepläp çıqtı.
Yewropa Berlegeneñ tışqı säyäsät öçen cawaplı ölkän wäkile Javier Solana Rusiä Yewropa Berlegeneñ teläktäşlegenä häm yardämenä ömet itä ala dide.
