Accessibility links

Кайнар хәбәр

Rinat Zakirov: “Böten dönya tatarların berläşterergä kiräk”


11nçe fevral'dä Bötendönya tatar kongressı Başqarma komitetınıñ xalıqara mönäsäbätläre häm keşe xoquqları buyınça komissiä utırışı bulıp ütte. Utırışnı älege komissiäneñ räise, Tatarstan prezidentınıñ kiñäşçese Rafael' Xakimov alıp bardı. Berençe çığışnı Tatar kongressınıñ citäkçese Rinat Zakirov yasadı. Ul böten dönya tatarların berläşterü kiräklege turında söyläde.

Annan soñ süzne Yaqın häm çit illär belän eşläwçe bülek mödire Damir Ğismetdinov aldı. Üzeneñ çığışında ul Bötendönya tatar kongressı Başqarma komitetınıñ yaqın häm yıraq çit illärdä urnaşqan tatar oyışmaları belän 2004nçe yılğa eş planı belän tanıştırdı, BDB häm Baltiä illärendä yäşäwçe millättäşlärebezgä yärdäm itü buyınça Respublika programmasına täqdimnär äzerläw turında äytte.

Möhacirlär belän eşläw täcribäse häm xäl iteläse problemalar turında elekke yıllarda Watan cämğiätendä häm möstäqil räweştä dä çit il tatarları belän xezmättäşlek itüçe zıyalılar qatnaştı. Çığış yasawçılar arasında İlbaris Nadirov, İskändär Ğiläcev, Al'bert Borhanov, Räbit Batulla, Rimzil Väliev çığış yasadılar. Çit il tatarları belän daimi elemtädä toruçı İldus Sadıyqov üzeneñ Törkiägä barıp, millättäşlärebez belän oçraşu turında söyläde.

Älbättä, çit ildäge tatarlar belän elemtälärne eşlekle räweştä alıp baru bügen genä başlanmadı. Utırışta qatnaşuçılar xäzer Tatar kongressı Başqarma komitetı qanatı astında möhacirlek problemaların yañaça häm professional' däräcädä alıp baru mömkinlegen äyttelär. Törle illärdä eşlägän cämğiätlärne barlaw, alarnıñ tarixı, Tatarstan belän elemtäläre, ataqlı keşeläre turında beleşmä buldıru kiräklege turında äytelde. Şuşı nisbättän, kongress wäkilläre arasında yaqın häm yıraq çit illär buyınça cawaplı keşelär bilgelände. Bu isemlek belän çit il tatarları belän eşläw bülege xezmätkäre Röstäm Ğäynetdinov tanıştırdı.

Al'bina Zäynulla, Qazan

XS
SM
MD
LG