Çärşämbe könne tatarça gäcitlär küp çıqmıy, barı tik Watanım Tatarstan häm Şähri Qazan gäcitläre genä. Tatarstannıñ çit illärdäge häm Rusiä töbäklärendäge wäkilläre kiñäşmäsendä nindi qızıqlı xällär buluı turında ber genä gäcit tä, xätta intertat.ru elektron gäcite dä ällä ni täfsille mäğlümat bastırmağan. Ämma Tatarstan ilçeläre Qazanğa cıyılğaç närsä turında kiñäş tota dip sorıysı kilä. Bu xaqta tatar informnıñ ber mäqäläsen Watanım Tatarstan gäcitendä tabırğa bula.
Ni öçen bu räsmi mäğlümatnı başqa gäcitlär birmägän, anısı ser bulıp qala.
Älege kiñäşmädä prezident apparatı citäkçese wazifasın başqaruçı Cäwdät Salixov, tışqı elemtälär departamentı direktorı Timur Akulov çığış yasağan. İqtisad, tışqı säwdä, aldınğı texnologiälär, Qazannıñ meñ yıllığına äzerlek turında söyläşüdän başqa RF Tışqı eşlär ministrlığınıñ Watandaşlar belän eşläw idäräse citäkçese urınbasarı Sergey Nikolayev çığış yasadı. Nikolaev xäbär itkänçä, 29nçı ğinwarda Xökümät komissiäse federal' byudjet çaralarınnan watandaşlarğa faydalanu yünäleşläre isemlegen raslağan. 2004nçe yılda bülep birelgän 252 million sumnıñ 46% Rusiädä, ä 54% çit illärdä totılaçaq. Bu aqçalar Rossiä tarixındağı yubiley könnärenä bağışlanğan konferensiälär, Böyek Watan suğışınıñ yubiley datalarına bäyle çaralar ütkärügä kitäçäk. Sergey Nikolaev şulay uq BDB illärendäge rus mäktäplären uqu, metodik äsbäplär belän tä'min itügä, mäğärif bülekläre öçen kadrlar äzerläwdä kürsätelep kilgän yärdäm turında da söyli. Bötendönya tatar kongressı başqarma komitetı räise Rinat Zakirov üzeneñ çığışında tatar telen öyränü, Rossiä töbäklärendä tatar mäktäplären açu problemasına qağılıp ütte.
Watanım Tatarstan gäciteneñ “Uqıtuçı, uram seberüçe häm rässam” dip atalğan mäqälädä Mari İl Respublikada yäşäwçe ağaçtan çın mäğnäsendä näfis äyberlär, suvenirlar yasaw ostası Eduard Bäyrämov turında yazma bar. “Vremya i dengi” gäcitendä Vladimir Jirinovskiy 5 yıl elek Mongoliägä quu iğlanınnan baş tarta, jurnalistlar aldadı dip aqlana ul. Xäzer LDPR başlığı Qazanda metro tözüne bik tä xuplawın äytä. Kem belä anı, quğanmı Jirinovskiy tatarlarnı, qumağanmı. Rus mäqäle - suz çıpçıq tügel, ber çığıp oçsa kire qaytaralmıysıñ. Jirinovskiynıñ çıpçığı yıraqlarğa oçtı şul.
Şähri Qazanda Näfis Safiullinnıñ “İñ aqıllılarnı tatarça öyrätergä kiräk” mäqäläsendä Sovet rayonında ütkärelgän “Uquçılarnıñ icadi festivale” turında yazılğan. Gäcittä tarixçı Sälam Alişevnıñ ütkän yılda basılıp çıqqan “Qazan xanlığı tarixınnan” dip atalğan kitabı turında da qızıqlı yazma bar.
Al'bina Zäynulla
