Accessibility links

Кайнар хәбәр

İzrail' AQŞ yuğarı wäkillären fälestinlelärdän beryaqlı ayırılu planı belän tanıştırdı


İzrail' premyer ministrı Ariel Şaron bügen Quşma Ştatlarnıñ 3 yuğarı wäkile belän oçraşıp alarnı İzrail'neñ fälestinlelärdän beryaqlı çitläşü planı belän tanıştırdı. İzrail'neñ ber yuğarı räsmie äytüençä, Şaron AQŞ däwlät sekretarenıñ Yaqın Könçığış mäs'äläläre yardämçese William Burns, Aq Yort räsmiläre Steve Hadley häm Elliot Abrams belän oçraşıp fälestinlelärdän ayırılu planı turında söyläşkän. Bul planda berençe adım itep Gaza Sızığınnan 17 yähüd bistäsen çığaru atala. Quşma Ştatlar yähüd bistälären çığarunı xuplasa da, bu plan AQŞ, Yewropa Berlege, Rusiä häm BMO yaqlağan yul xaritası planın almaştırmasqa dip beldergän ide. Fälestinlelär İzrail Gaza Sızığındağı bistälärne çigerügä almaşqa kiläçäktä Könbatış Yardağı cirlärne taläp itärgä mömkin dip borçıla. Elekke söyläşülärdä Fälestinlelärneñ baş wäkile bulğan Saeb Erekat İzrail'-Fälestin nizağına çişeleş ike yaqlı bulırğa tieş, beryaqlı bulmasqa tieş di. Bügen AQŞ wäkilläre fälestin citäkçeläre belän dä oçraşır dip kötelä.
XS
SM
MD
LG