İerusalim. Xalıqara ğadellek mäxkämäseneñ kiläse atna başında İzrail tözep yatqan "iminlek diwarı"nıñ qanuni bulu-bulmawın tikşerüe aldınnan İzrail şul kirtäneñ ber öleşen sütäçägen xäbär itte. İlneñ saqlanu ministrlığı wäkile, bu eş irtägä başlanaçaq häm barlığı 8 çaqrım diwar süteläçäk dip belderde. Anıñ süzlärenä qarağanda, monıñ Xalıqara mäxkämä utırışı başlanuına bäyläneşe yuq, İzrail bu eşne inde 6 ay elek ük planlaştırğan bulğan. Yähüd yağı älege diwarnıñ kiräklegen ilne fälästin höcümçelärennän saqlaw kiräklege belän añlata. Ämma fälästin premyer-ministrı Äxmät Qıray diwarnı, okkupatsiälängän cirlärne umırıp alu dip bäyäli häm fälästin yağı, mäxkämä diwarğa qarşı qarar qabul itär, çönki anı qoru qanunsız digän ömettä tora dip belderä. Şuşı diwarnı qoruğa Quşma Ştatlar da, Yevropa Berlege dä qarşı çığa, läkin alar bu eşkä Xalıqara ğädellek mäxkämäsen cälep itüne xuplamıy.
