Sişämbe könne irtän Qazanda Tatarstan qanunın federal' qanunğa täñgälläşterügä bağışlanğan Tatarstan Yuğarı mäxkämäse utırışı başlandı. İnde xäbär itkänebezçä Tatarstan Däwlät Şurasınıñ ikençe çaqırılışınıñ iñ soñğı utırışında Tatarstan prokurorınıñ Tatarstan Respublikasınıñ 1999nçı yılnıñ 15nçe sentäberendä qabul itelgän “Latin grafikasına nigezlängän tatar alfavitın torğızu turında”ğı qanunın federal' qanunnar tözeleşenä qarşı kilüen tanu turında Tatarstan Yuğarı mäxkämäsenä ğariza birüe mäğlüm buldı. Däwlät Şurası şunda uq uzğan yılnıñ martında uq latinğa küçü turındağı qanunnı yuqqa çığarğan “Rusiä Federatsiäse xalıqları telläre turında”ğı qanunnıñ 3nçe matdäseneñ 6nçı punktına östämälärneñ konstitutsionlığı turında Rusiä konstitutsion mäxkämäsenä möräcäğät qabul itep quydı. Mäxkämä eşe menä şundıy şartlarda başlanıp kitte. Ğädättägeçä mondıy mäxkämä eşendä cawapnı Däwlät Şurasınıñ Qanun çığaru, qanunilıq komissiäse räise Midxät Kormanov tottı. Aña Tatarstan prezidentı qarşındağı Däwlät xoquq idäräse wäkile Vladimir Kaşçepov bulıştı. Midxät Kormanov mäxkämä utırışı başlanır aldınnan üteneç belän çıqtı... yäğni Rusiä Konstitutsion mäxkämäse Däwlät Şurası möräcäğäten qaramıy torıp bu eşne tuqtatıp torırğa. Şulay uq Tatarstan Yuğarı mäxkämäsenä Rusiä konstitutsion mäxkämäsenä bu mäs’älägä açıqlıq kertüne sorap möräcäğät itärgä. Mäxkämä eşendä Tatarstan Prokuraturası mänfäğätlären yaqlawçı prokuror Galina Sinkova Konstitutsiä mäxkämäse qararın kötep mäxkämä eşen kiçekterü xoquqi tügel dip belderde. Çönki kiläçäktä tuaçaq wäzğiätkä qarap eş yörtelmi ä xäzerge wäzğiät qarala. Töbäklär qanunnarın federal' qanunnar belän täñgälläşterü öçen birelgän mötdät 2003nçe yılnıñ 23nçe dekaberendä çıqqan inde. Läkin sudya Radik Gabdullin... mäxkämä, eş alıp barunı tuqtatıp toru turında, urında ğına xäl itte dip beldergäç kötmägändä Midxät Kormanov –Däwlät Şurasınnan miña andıy wäkälätlär birelmäde-dip birelde. Bu närsä digän süz? Büre dä tuq sarıqlar da isän qalsın- digän dilemmanı çişüme ällä. Mäxkämä utırışı başlanır aldınnan Bötentatar ictimaği üzäge piket oyıştırdı. Piketçılar mäxkämä utırışı barğan bülmäneñ täräzä töbendä- Mäskäw bezne nindi imlada yazarğa da öyrätmäsen- digän kisken şiğär qıçqırıp tordılar. TİÜ räise Räşit Yagfärov utırış barışın baştan ayaq tıñlap utırdı. Utırıştan soñ Yuğarı Mäxkämä binasında qısqa ğına äñgämä qordıq...
Şulay itep 2 martta Tatarstannıñ “Latin imlasına nigezlängän tatar alfavitın torğızu turında”ğı qanunın Rusiä qanunı belän täñgälläşterü mäxkämä eşe başlandı, 10 martqa xätle anıñ eşendä tänäfes iğlan itelde.
Yunıs Ätnäle.
