Accessibility links

Кайнар хәбәр

Tatar tele statusı öçen köräş tuqtamayaçaq


Başqortstan matbuğatında soñğı könnärdä Tatarstanğa qarşı höcümnär tağın yaña dulqın bulıp köçäyep kitte. Bu atnada respublika räsmi matbuğat basmaları 27 fivral könne Mäskäwneñ «Novie izvestiä» gäzitendä basılğan, Tatartsanğa häm anıñ prezidentı Mintimer Şäymievqa törle ğäyeplär taşlağan mäqäläne üzlärenä küçterep bastıru belän mäşğül buldı. Älege bik bäxäsle yazma 5 mart, comğa sanında başqort telendä çığuçı «Başqortstan» gäzitendä dä dönya kürde.

«Novie izvestiä» gäzite xäbärçese Aleksandr Perovskiynıñ bu mäqäläse Başqortstan cämäğätçelegendä qapma – qarşılıqlı fikerlär tudırdı. Respublka citäkçeläre häm başqort xalqı küñelenä ul, älbättä, sarı may bulıp yattı. Ä Başqortstan tatar milli oyışmaları wäkilläre häm kiñ tatar cämäğätçelege Mäskäw jurnalistı yazmasın Başqortstan yağınnan quşu buyınça yazılğan uydırma dip bäyäläde. «Novie izvestiä» gäzitendä ber atna elek dönya kürgän ul yazmanı Başqortstan räsmi mäğlümat çaralarınıñ da, ber – bersen uzdırışıp, üzlärendä çığaruı añlaşıla inde. Östän quşılğaç, alar teläsä – telämäsä dä bastırırğa tieş. Başqortstandağı tatar milli oyışmaları soñğı atnalarda tatar telenä dä däwlät tele statusın bik täwäkkäl räweştä taläp itä başlağaç, republík xakímítları üzläre dä höcümgä küçärgä buldı, şikelle. Monı älege mäqälä tiräsendäge ığı – zığılar ğına tügel, ä başqa waqíğalar da açıq kürsätä.

Elegräk tä xäbär itelüençä, 25 fivraldä Ufada Bötendönya Tatar kongressı Başqarma qömitetı üzeneñ küçmä utırışın ütkärgän ide. Anda da tatar telenä däwlät tele statusın taläp itü mäsäläse böten kiskenlegendä kütärelde. Menä şul utırıştan soñ, Başqortstan xakímítları republíktağı qayber tatar milli oyışmaları citäkçelärenä basım yasawğa küçä başladı. Älegä üz isemnären äytmäwne ütengän qayber tatar milli xäräkäte liderları süzlärençä, alarnı republík prezidentı xakímítına häm başqa idarä strukturlarına çaqırıp, eşkärtü, «añlatu», nıqlı kisätü çaraları ütkärelgän.

Mäğlüm buluınça, tatar milli oyışmaları Başqortstanda tatar tele statusın xäl itü buyınça yärdäm sorap Rusiä prezidentı Vladimir Putinğa xatlar äzerlägän ide. Işanıçlı çığanaqlardan alınğan xäbärlärgä kürä, ul xatlar il prezidentınıñ şäxsän üzenä tapşırılğan da inde. Tatarstannıñ Başqortstandağı Säwdä – iqtisadi wäkilçelege citäkçese, Bötendönya Tatar kongressı Başqarma komitetı äğzası Ramil Bignov süzlärençä, älege köndä tatar milli oyışmaları Rusiä citäkçeläre belän älege çeterekle mäsälä buyınça kiñäşläşülär alıp bara. Kiläse atnada Putin äfändedän Başqortstan tatar milli oyışmaları häm Bötendönya Tatar kongressı Başqarma qömitetı xatlarına nindi dä bulsa cawap alınuı ixtimal. Härxäldä, 14 marttağı saylawlarğa qädär bu mäsälädä açıqlıq kerüenä ömetlänä Başqortstan tatar cämäğätçelege. Niçek kenä bulmasın, tatar milli oyışmaları saylawlardan soñ da Başqortstanda tatar telenä dä däwlät tele statusı alu öçen köräşne tuqtatmayaçağın äytä.
XS
SM
MD
LG