Şimbä könne dönya kürgän tatarça gäcitlär dä atna axırında çıqqan matbuğatnıñ temasın däwam itä. Alarnıñ barısında da 8 mart – Xalıqara xatın-qızlar bäyräme uñayınnan yazmalar, täbrikläwlär, matur teläklär, urın alğan. Watanım Tatarstannıñ 7 mart sanında Tatarstan prezidentı Mintimer Şäymievneñ 8 mart uñayınnan xatın-qızlarğa möräcäğäte basılğan. Şulay uq gäcitneñ bu sanında respublika xakimiätendäge xatın-qızlar turında da yazma bar. Annan kürengänçä, mäsälän Tatarstannıñ Däwlät Şuarsında xatın-qız deputatlarnıñ sanı nibarı 12 ikän. Bu barlıq deputatlarn sanınnan nibarı 5 protsent tiräse genä. Watanım Tatarstan şularnıñ berse – Valentina Lipijina belän tanıştırıp, deputat xanım belän äñgämä dä täqdim itä. Annan tış monda bäyräm turında, anıñ tarixı xaqına irlärneñ fikerläre dä urın alğan. Şähri Qazannıñ da şaqtıy ğına öleşe güzäl zatlarğa bağışlanğan. Gäcitneñ şimbä sanınnan mäktäp uquçıları arasında uzdırılğan Tatar qızı-2004 bäygese häm anıñ ciñüçese Gölnara Ğälieva turında belep bula. Killäçäk yazda häm cäydä modadan artta qalmas öçen närsä kiärgä kiräklegen uqırğa da mömkin monda. Şulay uq Şähri Qazan üzeneñ uquçıların Tahir+Zöhrä klubınıñ citäkçese Aysılu Yäsävieva belän dä tanıştıra. Aysıly üzeneñ tanıştıru klubın tatar yäşläre öçen oyıştırğan. Tahir+Zöhräneñ niäte – törle illärdä, şähärlärdä sibelep yäşäwçe tatar yäşlären duslaştıru, alarğa üz millätlärennän bulğan kiäw, käläş tabıp birü, di Aysılu. Şunısın da äytergä kiräk, sezdä älege klubqa möräcäğät itärgä teläk tudı ikän, monıñ öçen Qazanğa kilep yörergä dä kiräkmi. Bu oçraqta sezgä bu klubnıñ İnternet säxifäse yärdämgä kiläçäk.
Mäğrifätneñ 7 mart sanı xatın-qız şağirälärneñ icatı belän tanıştıra. Sez monda Zemfira Nasıybullina, Marina Tsvetaeva, Näcibä Safinanıñ şiğerlären uqıy alasız. Annan tış bäyrämçä tema bulmasa da, xatın-qızlarğa qağılğan ber mäs’älä – fäxişälek problemasına tuqtala. Räşit Fätxraxmanovnıñ Gölbanu häm meñlägän Nataşalar digän yazmasında alar arasındağı ayırmalar häm urtaqlıq turında süz bara. Ä menä Veçernyaya Kazan gäcite Tatarstannıñ Eçke eşlär ministrı ğailäse belän tanıştıra, ministr-generalnıñ xatını, 3 bala änise Luiza xanım belän äñgämä täqdim itä.
Tatarstan yäşlärendä isä şulay uq bäyrämçä temalardan tış, tağın ber qızıqlı yazma urın alğan. Turı äytkän – tuğanına yaramağan digän mäqälädä Novaya İzvestiädä dönya kürgän V yazıkoznanii davno poznavşiy tolk dip isemlängän yazma xaqında süz bara. İnde xäbär itkänebezçä, bu mäqälädä Mintimer Şäymievne Başqortstanda tatar telenä däwlät tele statusın birüne taläp itüçe millättäşlärebezne yaqlağan öçen ğäyeplilär. Nişläp äle berdäm Rusiä sostavındağı respublikalardağı wazğiät häm millättäşlärneñ xäle turında açıqtan-açıq äytergä yaramasın? Mintimer Şäymievneñ Berdäm Rusiä firkäsendä räistäş buluı anıñ Rusiäneñ här töbägendäge xällärgä obyektiv bäyä birergä xoquqın ğına tügel, cawaplılığın da arttıra tügelmeni, digän sorawlar quyıla yazmada.
Gölnaz İlgizär
